គណៈកម្មាធិការ អាយស៊ីស៊ី-អង្គរ និង សំបូរព្រៃគុក បើកកិច្ចប្រជុំបច្ចេកទេសលើកទី ៤២ នៅខេត្តសៀមរាប

កាលពីព្រឹកថ្ងៃទី ៩ ខែមិថុនា ឆ្នាំ ២០២៦ នេះ គណៈកម្មាធិការអន្តរជាតិសម្របសម្រួលកិច្ចគាំពារ និង អភិវឌ្ឍន៍តំបន់រមណីយដ្ឋានប្រវត្តិសាស្រ្តអង្គរ និង សំបូរព្រៃគុក (ICC-Angkor Sambor Prei Kuk) បានបើកកិច្ចប្រជុំបច្ចេកទេសលើកទី ៤២ នៅខេត្តសៀមរាប។

កិច្ចប្រជុំនេះដឹកនាំដោយ​ លោក​ស្រីបណ្ឌិតសភាចារ្យ​ ភឿង សកុណា រដ្ឋមន្ត្រី​ក្រសួងវប្បធម៌ និង​ វិចិត្រ​សិល្បៈ និងជា​ប្រធានក្រុម​ប្រឹក្សាភិបាល ​នៃអាជ្ញាធរជាតិអប្សរា​ លោក NAGASE Kensuke ​អនុប្រធានបេសកកម្ម​ស្ថានទូត​ជប៉ុនប្រចាំកម្ពុជា​​ និង ​លោក Pierre VINCENT ទទួលបន្ទុកបេសកកម្ម និង​ វប្បធម៌​ នៃ​ស្ថានទូត​បារាំងប្រចាំកម្ពុជា​​។

កិច្ចប្រជុំនេះដែរប្រព្រឹត្តទៅមានរយៈពេល ២ ថ្ងៃ ចាប់ពីថ្ងៃទី ៩ រហូតដល់ថ្ងៃទី ១០ ខែមិថុនា ឆ្នាំ ២០២៦ ទាំងអ្នកជំនាញកម្ពុជា និងអន្តរជាតិ នឹងពិភាក្សា ព្រមទាំងពិនិត្យមើលរបាយការណ៍អភិរក្ស ដំណើរការជួសជុលប្រាសាទបុរាណ និង រមណីយដ្ឋាននានា នៅក្នុងតំបន់រមណីយដ្ឋានអង្គរ និង សំបូរព្រៃគុក ព្រមទាំងផ្ដល់អនុសាសន៍បច្ចេកទេសមួយចំនួនថែមទៀតផង។ បន្ថែមលើនេះ ស្មារតី នៃកិច្ចប្រជុំ ក៏បានបង្ហាញពីគោលបំណងសំខាន់ដោយផ្តោតទៅលើការអភិរក្សថ្មប្រាសាទបុរាណ និង ការអភិវឌ្ឍ ការធ្វើឲ្យមាននិរន្តរភាពបរិស្ថាន ព្រៃឈើ ព្រមទាំងគាំទ្រដល់ការបណ្ដុះបណ្ដាលធនធានមនុស្ស លើជំនាញអភិរក្ស និង ផ្នែកបច្ចេកទេសជាច្រើន៕
អត្ថបទ ៖ គឿនវេត