​កម្ពុជា​ ប្រកាស​ហាមឃាត់​ការនាំចូល​ទំនិញ​ដែល​ប្រើប្រាស់​ការងារ​ដោយបង្ខំ​

រាជរដ្ឋាភិបាល​បាន​ប្រកាស​ហាមឃាត់​ការនាំចូល​ទំនិញពាក់ព័ន្ធការងារដោយបង្ខំ សំដៅធានា​ខ្សែ​ច្រវាក់​ផ្គត់ផ្គង់​ប្រកប​ដោយ​ការទទួលខុសត្រូវ និងលើកកម្ពស់ភាពប្រកួតប្រជែង។​

លោក ហេង សួរ រដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា កម្ពុជាបន្តប្តេជ្ញាលើកកម្ពស់​សិទ្ធិការងារនៅក្នុងគ្រប់ខ្សែច្រវាក់ផ្គត់ផ្គង់សកល ជាពិសេសការលុបបំបាត់ការប្រើប្រាស់ការងារដោយបង្ខំលើទំនិញដែលនាំចូល និងផលិតនៅក្នុងស្រុក ដោយបានដាក់ចេញនូវប្រកាសអន្តរក្រសួង ស្តីពីការហាមឃាត់ការនាំចូលទំនិញដែលប្រើប្រាស់ការងារដោយបង្ខំ។

​យោងតាមសេចក្ដីសម្រេច ក្រុមកាងារអន្តរក្រសួង​ មានសមាសភាព​ពីក្រសួងសេដ្ឋកិច្ច ​និងហិរញ្ញវត្ថុ ក្រសួងពាណិជ្ជកម្ម ​ក្រសួងការងារ ​និងបណ្ដុះបណ្ដាលវិជ្ជាជីវៈ ​និងក្រសួងស្ថាប័នពាក់ព័ន្ធ ​សម្រាប់ត្រួតពិនិត្យទំនិញ​ ដែលត្រូវសង្ស័យថា ​មានពាក់ព័ន្ធនឹងការងារដោយបង្ខំ៕