ទំនាស់បងប្អូនថ្លៃឈានដល់ប្រើកាំបិតខ្វែវ ម្ខាងដេកពេទ្យ ម្ខាងដេកគុក

ខេត្តបាត់ដំបង៖ ជនសង្ស័យម្នាក់ដែលត្រូវជាប្អូនថ្លៃ ត្រូវបានសមត្ថកិច្ចនៃអធិការដ្ឋាននគរបាលស្រុកថ្មគោល ធ្វើការឃាត់ខ្លួនដើម្បីបញ្ជូនទៅតុលាការ បន្ទាប់ពីជនសង្ស័យរូបនេះបានប្រើកាំបិតខ្វែវកាប់ទៅលើបងថ្លៃរបស់ខ្លួន បណ្តាលឱ្យរងរបួសធ្ងន់។

លោកអធិការ សេង លុច បានលើកឡើងថា ករណីហិង្សាដោយមានស្ថានទម្ងន់នេះបានកើតឡើងនៅថ្ងៃទី១៩ ខែមិថុនា ឆ្នាំ២០២១ វេលាម៉ោង១០ និង ២០នាទីព្រឹក ត្រង់ចំណុចក្រុមទី៥៩ ភូមិបឹងព្រីង ឃុំបឹងព្រីង ស្រុកថ្មគោល ខេត្តបាត់ដំបង។

លោកអធិការបានបន្តថា ករណីនេះគឺបានបង្កឡើងដោយឈ្មោះ បាន គឹមសឹង ភេទប្រុស អាយុ២២ឆ្នាំ រស់នៅត្រង់ចំណុចខាងលើ និងត្រូវជាប្អូនថ្លៃបានយកកាំបិតខ្វែវកាប់ទៅលើជនរងគ្រោះឈ្មោះ ប៉ិញ ជឿម ភេទប្រុស អាយុ៣៣ឆ្នាំ ( បងថ្លៃ ) រស់នៅភូមិឃុំជាមួយគ្នា បណ្តាលឱ្យរងរបួសត្រង់កែងដៃខាងស្តាំ (របួសធ្ងន់) ត្រូវក្រុមគ្រួសារបញ្ជូនទៅមន្ទីរពេទ្យង្អែកខេត្តបាត់ដំបង។

ដើមចមនៃរឿងនេះគឺបណ្តាលមកពី បងថ្លៃហាមប្អូនកុំឱ្យដើរលេងឥតប្រយោជន៍ច្រើនពេក ទើបមានការតឹងសរសៃកដាក់គ្នា ក៏ឈានដល់កើតអំពើហិង្សាតែម្តង។ បច្ចុប្បន្នជនសង្ស័យត្រូវបានប៉ូលិសឃាត់ខ្លួនដើម្បីបញ្ជូនអនុ​​វត្តតាមនីតិវិធីផ្លូវច្បាប់៕

អត្ថបទ៖ សោ និយមរ័ត្ន