កីឡា

ក្រុមបាល់ទះកម្ពុជា ធ្វើការធ្ងន់ នៅពូល B ជាមួយ ឥណ្ឌូណេស៊ី និង ហ្វីលីពីន ពាន SEA V. League 2026

បានផុស

៦ នាទី មុន

នៅ

ថ្ងៃសុក្រ ៣ កក្កដា ២០២៦

ដោយ

ការប្រកួតកីឡាបាល់ទះជើងឯកលំដាប់ទី១ ប្រចាំតំបន់អាស៊ាន SEA V. League ត្រូវបានប្រើរូបមន្តថ្មី បន្ទាប់ពីបង្កើនក្រុមចូលរួមប្រកួតរហូតដល់ ៦ ក្រុម សម្រាប់ឆ្នាំ ២០២៦ ដែលនឹងដំណើរការប្រកួតនៅប្រទេសហ្វីលីពីន និងឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់ SEA V. League សម្រាប់ក្រុមបាល់ទះជម្រើសជាតិខ្លាំងៗនៅតំបន់អាស៊ានចូលរួមប្រកួតត្រូវបានបង្កើតឡើងកាលពីឆ្នាំ ២០២៣ ដែលមួយឆ្នាំមានការប្រកួតពីរជុំ។ ការប្រកួត ៣ ឆ្នាំកន្លងមកនេះគឺមានតែក្រុម ៥ ប៉ុណ្ណោះចូលរួមប្រកួត។ រូបមន្តនៃការប្រកួតគឺវិលជុំសន្សំពិន្ទុ។ ក្រុមណាឈ្នះច្រើន និងរកបានពិន្ទុច្រើនជាងគេឈរលេខ១ គឺក្លាយជាជើងឯកតែម្តង។

ទោះបីជាយ៉ាងណា សម្រាប់ឆ្នាំ ២០២៦ នេះក្រុមត្រូវបានបង្កើនឡើងដល់ ៦ ក្រុម គឺ កម្ពុជា មីយ៉ាន់ម៉ា វៀតណាម ហ្វីលីពីន ឥណ្ឌូណេស៊ី និង សៀម។ ក្រុមមីយ៉ាន់ម៉ាជាសមាជិកថ្មីទើបចូលរួមប្រកួតនៅឆ្នាំ២០២៦។ តាមរយៈក្រុមមានដល់ ៦ ការប្រកួតត្រូវបានប្រើរូបមន្តថ្មី ដោយបែងចែកជាពូលគឺមួយពូលមាន ៣ ក្រុម។ ក្រុមលេខ ១ និងលេខ ២ នៃពូលទាំងពីរបានឡើងវគ្គពាក់កណ្តាលផ្តាច់ព្រ័ត្រ បន្ទាប់ពីចប់វគ្គសន្សំពិន្ទុក្នុងពូល។

បន្ទាប់ពីចាប់ឆ្នោតរួចរាល់ ក្រុមកម្ពុជា ស្ថិតនៅពូល B ជាមួយម្ចាស់ផ្ទះ ហ្វីលីពីន និង ឥណ្ឌូណេស៊ី ខណៈពូល A មាន សៀម មីយ៉ាន់ម៉ា និង វៀតណាម។ តាមកម្រិតគុណភាពក្រុមនៅពូល B តឹងខ្លាំងជាងគេ ដោយសារសុទ្ធតែក្រុមខ្លាំង ក្នុងនោះ ហ្វីលីពីន ជាក្រុមធ្លាប់ប្រកួតក្នុងព្រឹត្តិការណ៍បាល់ទះជើងឯកពិភពលោក កាលពីឆ្នាំ ២០២៥។ ពួកគេមានកីឡាករលេងនៅជប៉ុន តៃវ៉ាន់ និងកម្ពុជា។ ចំណែក ឥណ្ឌូណេស៊ី ជាក្រុមខ្លាំងឈានមុខគេប្រចាំតំបន់អាស៊ាន។ ជាពិសេស ក្រុមឥណ្ឌូណេស៊ី ទើបតែឈ្នះជើងឯកអាស៊ី AVC Men’s Volleyball Cup ឆ្នាំ ២០២៦ កាលពីពេលថ្មីៗនេះ ដូច្នេះសម្រាប់ កម្ពុជា ពិតជាត្រូវធ្វើការធ្ងន់ និងពិបាកខ្លាំងក្នុងការឆ្លងឲ្យផុតពូល។

សម្រាប់ពូល A វិញ សៀម ជាក្រុមខ្លាំងជាងគេ ប៉ុន្តែសម្រាប់ វៀតណាម និង មីយ៉ាន់ម៉ា មិនសូវខ្លាំងប៉ុន្មានឡើយ បើប្រៀបធៀបជាមួយនឹងពូល B គឺ ហ្វីលីពីន និងឥណ្ឌូណេស៊ី។

សូមបញ្ជាក់ថា ក្រុមបាល់ទះកម្ពុជា បានចូលរួមប្រកួតពានរង្វាន់ SEA V. League ជាលើកដំបូងកាលពីឆ្នាំ ២០២៥ ដោយមិនទទួលបានលទ្ធផលល្អសោះ។ ការប្រកួតចំនួន ៨ ប្រកួតគឺចាញ់ទាំងអស់ ប៉ុន្តែមិនត្រូវបានកាត់ចេញទេ ដោយសារពានរង្វាន់កម្រិតទី២ SEA V. League Challenge មិនមានរៀបចំការប្រកួត។

ការប្រកួតពានរង្វាន់ SEA V. League ឆ្នាំ ២០២៦ ជុំទី១ គ្រោងធ្វើពីថ្ងៃទី១៥ ដល់ ទី១៩ ខែកក្កដា នៅប្រទេសហ្វីលីពីន និងជុំទី២ ពីថ្ងៃទី២២ ដល់ ទី២៦ ខែកក្កដា នៅប្រទេសឥណ្ឌូណេស៊ី។ ក្រុមបាល់ទះជម្រើសជាតិកម្ពុជា ត្រូវប្រមូលផ្តុំហ្វឹកហាត់ភ្លាមៗសម្រាប់ការចូលរួមប្រកួតពានរង្វាន់នេះ បន្ទាប់ពីចប់ព្រឹត្តិការណ៍បាល់ទះតេជោលីគ រដូវកាលទី ៣៕