អាល្លឺម៉ង់ រងគ្រោះធ្ងន់ធ្ងរដោយទឹកជំនន់ ស្លាប់និងបាត់ខ្លួនជិត ៨០នាក់

មនុស្សចំនួន៩នាក់បានស្លាប់ និងជាង៧០នាក់កំពុងបាត់ខ្លួន បន្ទាប់ពីគ្រោះទឹកជំនន់ធ្ងន់ធ្ងរដែលបង្កឡើងដោយព្យុះភ្លៀង បានវាយប្រហារភាគខាងលិចប្រទេស អាល្លឺម៉ង់។

មានមនុស្សស្លាប់ចំនួន ៤ នាក់ ត្រូវបានគេរាយការណ៍នៅភាគខាងត្បូងនៃទីក្រុង Bonn ដែលជាតំបន់ផលិតស្រានៅតាមដងទន្លេ Ahr។

ទឹកទន្លេបានឡើងផុតច្រាំង ហើយបណ្តាលឲ្យផ្ទះចំនួន៦ខ្នង បាក់រលំ។ សំណង់នានានៅរដ្ឋ Rhineland-Palatinate ក៏បានដួលរលំផងដែរ កាលពីយប់មិញ។

កាសែត Bild បានដកស្រង់សម្តីប៉ូលិស ដែលនិយាយថា អ្នកស្លាប់នៅទូទាំងប្រទេសមានចំនួន ៩ នាក់និង ៧០ នាក់ទៀត កំពុងបាត់ខ្លួន។

ផ្ទះប្រមាណ ២៥ ខ្នងទៀត ក៏កំពុងស្ថិតក្នុងគ្រោះថ្នាក់នៃការដួលរលំផងដែរ នៅទីក្រុង Schuld bei Adenau ក្នុងតំបន់ភ្នំ Eiffel។

ទូរទស្សន៍ SWR ផ្សាយថា ស្ថានភាពនៅតំបន់ជនបទ Eifelkreis Bitburg-Prum ពិតជាមានគ្រោះថ្នាក់ខ្លាំងណាស់ ខណៈមនុស្សរាប់សិបនាក់ កំពុងជាប់នៅលើដំបូលផ្ទះ។

មនុស្សជាច្រើនត្រូវបានជម្លៀសចេញ នៅតាមតំបន់ក្នុងរង្វង់ចម្ងាយ ៥០ ម៉ែត្រនៃទន្លេ Ahr។ ក្រុមអ្នកជួយសង្គ្រោះ បានជាប់នៅតំបន់ខ្លះ ដោយសារចរន្តទឹកជំនន់ ហូរខ្លាំងពេក៕

ប្រែសម្រួល៖ Vann Vann

ប្រភព៖ SKY

ចុចអាន៖ ភ្លៀងធ្លាក់ខ្លាំងជន់លិចទីក្រុង ញូវយ៉ក កន្លែងខ្លះទឹក មានកម្ពស់ត្រឹមចង្កេះ (មានវីដេអូ)