ថៃ ប្រកាសមានអ្នកស្លាប់ដោយសារកូវីដ ហក់ឡើងដល់កម្រិតខ្ពស់បំផុត

ក្រសួងសុខាភិបាល បានរាយការណ៍នៅព្រឹកថ្ងៃអង្គារនេះថា ក្នុងរយៈពេល២៤ម៉ោងចុងក្រោយ ប្រទេសថៃ មានអ្នកស្លាប់ដោយសារជំងឺកូវីដ-១៩ ក្នុងចំនួនខ្ពស់បំផុតបំបែកកំណត់ត្រាថ្មី២៣៥នាក់ និងឆ្លងថ្មី ១៩,៨៤៣ករណី។

ក្នុងចំណោមការឆ្លងថ្មី មាន ១៩,៤៤៥ករណីជាប្រជាជនទូទៅនិង ៣៩៨ ករណីជាអ្នកទោសក្នុងពន្ធនាគារ។

ស្របពេលជាមួយគ្នានោះដែរ អ្នកជំងឺចំនួន ២២,៨០៦នាក់ បានជាសះស្បើយ និងត្រូវបានអនុញ្ញាតឲ្យចាកចេញមន្ទីរពេទ្យ។

ចាប់តាំងពីថ្ងៃទី១ខែមេសាមក នៅពេលកូវីដរលកទី៣ផ្ទុះឡើង មានអ្នកជំងឺកូវីដចំនួន ៧៦៧,០៨៨នាក់ ក្នុងនោះមាន ៥៥០,៧១៤នាក់បានជាសះស្បើយ។

ចាប់តាំងពីជំងឺរាតត្បាតផ្ទុះឡើងកាលពីដើមឆ្នាំមុនមក មានការឆ្លងសរុប ៧៩៥,៩៥១ករណី ក្នុងនោះមាន ៥៧៨,១៤០នាក់ បានជាសះស្បើយ។

ចំណែកចំនួនអ្នកស្លាប់ក្នុងរលកទី៣គឺមាន ៦,៤៩៤នាក់ ធ្វើឲ្យការស្លាប់សរុបចាប់តាំងពីរោគរាតត្បាតផ្ទុះឡើងកាលពីដើមឆ្នាំមុនមក កើនដល់ ៦,៥៨៨នាក់។

គួរបញ្ជាក់ថា កំណត់ត្រាចាស់ នៃការស្លាប់ប្រចាំថ្ងៃ ខ្ពស់បំផុតរបស់ថៃ គឺចំនួន ២១២នាក់ កាលពីថ្ងៃសៅរ៍៕

ប្រែសម្រួល៖ Vann Vann

ប្រភព៖ Bangkok Post

ចុចអាន៖ ប្រកាសមុននេះ ថៃ រកឃើញអ្នកឆ្លងកូវីដថ្មីជិត ២ ម៉ឺនករណី និងស្លាប់ ១៣៨ នាក់ក្នុងរយៈពេល ២៤ ម៉ោងចុងក្រោយ