ហេតុអ្វី អាស៊ី-ប៉ាស៊ីហ្វិក ប្រញាប់ប្រញាល់បញ្ជាទិញថ្នាំ Molnupiravir ម៉្លេះ?

ក្នុងអំឡុងពេលមានការប្រជែងជាសកល ដើម្បីទទួលបានវ៉ាក់សាំង ប្រទេសជាច្រើននៅតំបន់អាស៊ី-ប៉ាស៊ីហ្វិក មានភាពយឺតយ៉ាវ។ ប៉ុន្តែលើកនេះ ពួកគេនឹងមិនបង្កកំហុសដដែលទេ។

បណ្តាប្រទេសនៅជុំវិញតំបន់ កំពុងប្រញាប់ប្រញាល់បញ្ជាទិញអាវុធចុងក្រោយ ប្រឆាំងនឹងជំងឺកូវីដ-១៩ ដែលជាថ្នាំប្រឆាំងវីរុស ទោះមិនទាន់ត្រូវបានអនុញ្ញាតឲ្យប្រើប្រាស់នៅឡើយក៏ដោយ។

យោងតាមទិន្នន័យរបស់ក្រុមហ៊ុន Airfinity បានបង្ហាញថា ប្រទេសឬដែនដីចំនួន១០ កំពុងស្ថិតក្នុងការចរចាឬបានចុះហត្ថលេខារួចទៅហើយ លើកិច្ចព្រមព្រៀងថ្នាំគ្រាប់ Molnupiravir ហើយក្នុងនោះមានប្រទេសចំនួន ៨ ស្ថិតនៅក្នុងតំបន់អាស៊ី-ប៉ាស៊ីហ្វិក។

ប្រទេសខ្លះក្នុងចំណោមប្រទេសទាំងនោះ អាចនឹងព្យាយាមចៀសវាងកំហុសឆ្គងពីអតីតកាល នៅពេលការបញ្ជាទិញយឺតយ៉ាវ នាំឲ្យមានការពន្យារពេលចាក់វ៉ាក់សាំង។

លោកស្រី Rachel Cohen នាយកប្រតិបត្តិនៅអង្គការមិនរកប្រាក់ចំណេញ Drugs for Neglected Diseases Initiative បានលើកឡើងថា “មានប្រទេសដែលមានប្រាក់ចំណូលមធ្យមមួយចំនួនដែលខ្ញុំគិតថា កំពុងព្យាយាមមិនឲ្យធ្លាក់ចូលក្នុងអន្ទាក់ដដែល ដែលពួកគេត្រូវបានទុកចោលនៅពេលប្រទេសមានប្រាក់ចំណូលខ្ពស់ បានប្រមូលយកវ៉ាក់សាំងទាំងអស់”។

ទោះបីជាយ៉ាងណាក៏ដោយ គេមិនច្បាស់ទេថា តើប្រទេសនីមួយៗនឹងត្រូវចំណាយប្រាក់ប៉ុន្មានសម្រាប់ថ្នាំគ្រាប់នេះ។

គួរបញ្ជាក់ថា សហរដ្ឋអាមេរិកបានយល់ព្រមចំណាយប្រាក់ចំនួន ១.២ ពាន់លានដុល្លារ សម្រាប់ថ្នាំ ១.៧ លានឈុត ប្រសិនបើថ្នាំនេះត្រូវបានអនុម័តមែន។ នេះមានន័យថា រដ្ឋាភិបាលនឹងបង់ប្រាក់ប្រហែល ៧០០ ដុល្លារក្នុងមួយឈុត៕

ប្រែសម្រួល៖ Vann Vann

ប្រភព៖ CNN

ចុចអាន៖ ក្រុម សុខ ភាព អន្តរជាតិ អំពាវ នាវឲ្យ Merck គិត គូរ ថ្នាំ គ្រាប់ ព្យា បាល កូវីដ ដល់ ប្រទេស ក្រី ក្រី ផង