ប្រទេសចំនួន ១០៥ ត្រៀមទទួលថ្នាំគ្រាប់កូវីដ Molnupiravir តម្លៃថោក

អង្គការដែលគាំទ្រដោយអង្គការសហប្រជាជាតិ (UN) បាននិយាយកាលពីថ្ងៃព្រហស្បតិ៍ថា ក្រុមហ៊ុនផលិតឱសថទូទៅនឹងផលិតថ្នាំគ្រាប់ប្រឆាំងកូវីដរបស់ក្រុមហ៊ុន Merck ដែលមានតម្លៃសមរម្យសម្រាប់ប្រទេសក្រីក្រចំនួន ១០៥ របស់ពិភពលោក ។

អង្គការ Medicines Patent Pool (MPP) បានចុះហត្ថលេខាលើកិច្ចព្រមព្រៀងជាមួយក្រុមហ៊ុនចំនួន ២៧ ដើម្បីផលិតថ្នាំប្រឆាំងមេរោគលេបតាមមាត់ Molnupiravir សម្រាប់ផ្គត់ផ្គង់នៅក្នុងប្រទេសដែលមានចំណូលទាប និងមធ្យម ។

ក្នុងនោះ ក្រុមហ៊ុនផលិតចំនួន ៥ នឹងផ្តោតលើការផលិតគ្រឿងផ្សំវត្ថុធាតុដើម, ១៣ ក្រុមហ៊ុននឹងផលិតទាំងគ្រឿងវត្ថុធាតុដើម និងថ្នាំ Molnupiravir  ខណៈពេលដែលក្រុមហ៊ុនចំនួន ៩ នឹងបញ្ចប់ការផលិតថ្នាំទាំងស្រុងតែម្ដង ។

ចំណែកនាយកប្រតិបត្តិ MPP លោក Charles Gore បាននិយាយថា “នេះគឺជាជំហានដ៏សំខាន់មួយឆ្ពោះទៅរកការធានាឲ្យមានលទ្ធភាពទទួលបានជាសកលចំពោះការព្យាបាលកូវីដ ហើយយើងមានទំនុកចិត្តថា ការព្យាបាលពីថ្នាំ Molnupiravir នឹងមានយ៉ាងឆាប់រហ័ស” ។

បច្ចុប្បន្នក្រុមហ៊ុន Merck ត្រូវបានរីករាលដាលនៅទូទាំងប្រទេសមួយចំនួនដូចជា បង់ក្លាដែស ចិន អេហ្ស៊ីប ហ្ស៊កដានី ឥណ្ឌា ឥណ្ឌូណេស៊ី កេនយ៉ា ប៉ាគីស្ថាន អាហ្រ្វិកខាងត្បូង កូរ៉េខាងត្បូង និងវៀតណាម ។

គួរបញ្ជាក់ថា ថ្នាំ Molnupiravir គឺផ្ដល់ការព្យាបាលសម្រាប់អ្នកជំងឺកូវីដក្នុងរយៈពេល ៥ ថ្ងៃនៃការធ្វើតេស្តវិជ្ជមាន និងចេញរោគសញ្ញា ហើយការព្យាបាលថ្នាំនេះគឺកាត់បន្ថយហានិភ័យនៃការសម្រាកនៅមន្ទីរពេទ្យ ៕

ប្រែសម្រួលដោយ ៖ ជីវ័ន្ត

ប្រភព ៖ NDTV