អ្នកវិទ្យាសាស្ត្រថា ចាក់វ៉ាក់សាំង ៣ ដូសមិនគ្រប់គ្រាន់ទេ ៤ ដូសទើបកម្ចាត់ Omicron

នាយកផ្នែកសុខាភិបាលរបស់ប្រទេសន័រវេសលោក Bjørn Guldvog បានអះអាងថា ការចាក់វ៉ាក់សាំងកូវីដចំនួន ៣ ដូសប្រហែលជាមិនគ្រប់គ្រាន់នោះទេ ហើយដូសទី ៤ ប្រហែលជាចាំបាច់ដើម្បីកម្ចាត់ Omicron នៅ និទាឃរដូវនេះ ។

លោក Guldvog បាននិយាយថា ចំពេលមានការភ័យខ្លាចវីរុសបំប្លែងខ្លួនថ្មី Omicron អាចក្លាយជាបញ្ហាលេចធ្លោ និងគ្របដណ្ដប់លើពិភពលោក ក្រុមហ៊ុនផលិតវ៉ាក់សាំងកំពុងពិចារណាការចាក់ដូសថ្មី ក្នុងគោលបំណងជាពិសេសដើម្បីកម្ចាត់វីរុសថ្មីនេះ ។

លោក Guldvog បានប្រាប់ប៉ុស្តិ៍វិទ្យុ P4 Radio ថា “យើងត្រូវតែត្រៀមខ្លួនសម្រាប់ការពិតដែលថា វ៉ាក់សាំងកូវីដចំនួន ៣ ដូសគឺមិនគ្រប់គ្រាន់ទេ” ។

គួរបញ្ជាក់ថា វីរុស​កូវីដបំប្លែងខ្លួន Omicron ​ត្រូវ​បាន​​រក​ឃើញ​ជា​លើក​ដំបូង​នៅ​ អាហ្វ្រិក​ខាង​ត្បូង ហើយ​បាន​រាយការណ៍​ទៅ​ អង្គការ​សុខភាព​ពិភពលោក (WHO) នៅ​ ថ្ងៃ​ទី ២៤ ខែ​វិច្ឆិកា ។

ចាប់តាំងពីពេលនោះមក វាបានរីករាលដាលដល់ប្រទេសជាច្រើន រួមទាំងនៅ អឺរ៉ុប និងអាស៊ី ដែលរហូតមកដល់ពេលនេះក៏មានការរឹតបន្តឹងការធ្វើដំណើរបណ្ដាប្រទេសមកពីអាហ្វ្រិកផងដែរ ៕

ប្រែសម្រួលដោយ ៖ ជីវ័ន្ត

ប្រភព ៖ Sputnik

ចុចអាន ៖ សិង្ហបុរី មានឧបករណ៍តេស្ត PCR រកឃើញទាំង Omicron និងវីរុសបំប្លែងខ្លួនសាហាវមួយទៀត