កម្ពុជា នឹងទទួលបានជំនួយពីអង្គការកម្មសិទ្ធិបញ្ញាពិភពលោកចាប់ពីឆ្នាំ ២០២២ ដល់ឆ្នាំ ២០២៦

លោក ប៉ាន សូរស័ក្តិ  រដ្ឋមន្ត្រីក្រសួងពាណិជ្ជកម្មកម្ពុជា និងជាប្រធានគណៈកម្មាធិការជាតិគ្រប់គ្រងកម្មសិទ្ធិបញ្ញា និងលោក Daren Tang អគ្គនាយកអង្គការកម្មសិទ្ធិបញ្ញាពិភពលោក(WIPO)នៅថ្ងៃទី៩ ខែធ្នូ ២០២១ នេះ បានចុះហត្ថលេខាលើអនុស្សរណៈនៃការយោគយល់គ្នារវាងគណៈកម្មាធិការជាតិគ្រប់គ្រងកម្មសិទ្ធិបញ្ញានៃព្រះរាជាណាចក្រកម្ពុជា និងអង្គការកម្មសិទ្ធិបញ្ញាពិភពលោកស្តីពីការអនុវត្តផែនការរបស់ព្រះរាជាណាចក្រកម្ពុជាសម្រាប់កិច្ចសហប្រតិបត្តិការបច្ចេកទេស។

លោករដ្ឋមន្ត្រី ប៉ាន សូរស័ក្តិ បានបញ្ជាក់ថា អនុស្សរណៈនេះ នឹងក្លាយជាឧបករណ៍ដ៏សំខាន់មួយសម្រា​ប់កម្ពុជា ដើម្បីទទួលបានជំនួយបច្ចេកទេសពីអង្គការកម្មសិទ្ធិបញ្ញាពិភពលោកចាប់ពីឆ្នាំ ២០២២ ដល់ឆ្នាំ ២០២៦ លើកិច្ចការអាទិភាពជាច្រើនទាំងកម្រិតជាតិ កម្រិតស្ថាប័ ននិងកម្រិតសហគមន៍។ អនុស្សារណៈនៃការយោគយល់គ្នានេះ នឹងចូលរួមពង្រឹង និងអភិវឌ្ឍន៍ប្រព័ន្ធកម្មសិទ្ធិបញ្ញានៅកម្ពុជាឱ្យក្លាយទៅជាកម្លាំងចលករក្នុងការអភិវឌ្ឍសេដ្ឋកិច្ច ពាណិជ្ជកម្ម ឧស្សាហកម្ម វប្បធម៌ ទេសចរណ៍ និងកសិកម្ម តាមរយៈការលើកកម្ពស់កិច្ចការពារកម្មសិទ្ធិបញ្ញា កេរ្តិ៍ឈ្មោះ ម៉ាក និងផលិតផលរបស់ប្រទេសកម្ពុជា។

បន្ថែមលើនេះ វាក៏ជាការបង្កើត ស្នាដៃវប្បធម៌ តក្កកម្ម ធនធានពន្ធុ ចំណេះដឹងជាប្រពៃណី និងវិញ្ញាត្តិវប្បធម៌  ជំរុញការប្រើប្រាស់កម្មសិទ្ធិបញ្ញា ដើម្បីលើកកម្ពស់ការស្រាវជ្រាវ និងអភិវឌ្ឍន៍ក្នុងការបង្កើត ផលិតវផលបច្ចេកវិទ្យា និងជំរុញគំនិតច្នៃប្រឌិតនិងការបង្កើតថ្មី ព្រមទាំងឧស្សាហកម្មវប្បធម៌ឲ្យឆ្លើយតបទៅ នឹងបរិបទសេដ្ឋកិច្ច និងសង្គមឌីជីថល និងបដិវត្តឧស្សាហកម្ម ជំនាន់ទី៤ ។ ម្យ៉ាងទៀត ក៏ជាការចូលរួមចំណែកក្នុងការសម្រេចបាននូវចក្ខុវិស័យនៃព្រះរាជាណាចក្រកម្ពុជាឆ្នាំ ២០៥0 និងជាមូលដ្ឋានកសាងបរិយាកាសវិនិយោគប្រកបដោយទំនុកចិត្ត និងសង្គមដែលពោរពេញដោយនវានុវត្តភាព៕

អត្ថបទ៖ ណារី