រដ្ឋបាលក្រុងព្រៃវែងទទូចដល់ម្ចាស់អាជីវកម្មលក់ម្ហូបអាហារផ្ទះសំណាក់កុំដំឡើងថ្លៃថ្ងៃប្រឡងបាក់ឌុប

រដ្ឋបាលខេត្តព្រៃវែង ទទួចដល់ម្ចាស់អាជីវកម្មសណ្ឋាគារ ផ្ទះសំណាក់ បន្ទប់ជួល ភោជនីយដ្ឋាន អាហារដ្ឋានទាំងអស់ កុំដំឡើងថ្លៃ ថ្ងៃប្រឡងបាក់ឌុបខាងមុខ។

យោងតាមលិខិតជូនដំណឹងរបស់រដ្ឋបាលក្រុងព្រៃវែង កាលពីថ្ងៃទី ២០ ខែ ធ្នូ បានឲ្យដឹងដូច្នេះថា« នៅថ្ងៃទី ២៧-២៨ ខែធ្នូ ឆ្នាំ ២០២១  មានឪពុកម្តាយ អាណាព្យាបាល សិស្សានុសិស្សមកពីបណ្តាស្រុកជាច្រើន បាននាំកូនក្មួយមកស្នាក់នៅក្នុងក្រុងព្រៃវែង ដើម្បីចូលរួមប្រឡងសញ្ញាបត្រមធ្យមសិក្សាទុតិយភូមិសម្រាប់ឆ្នាំ ២០២១ ដើម្បីសម្រួលដល់ការហូបចុក ស្នាក់នៅតាមលទ្ធភាព និងតម្រូវការរបស់ពួកគាត់ សូមឲ្យម្ចាស់អាជីវកម្មទាំងអស់ ក្នុងក្រុងព្រៃវែង មេត្តាយោគយល់ កុំដំឡើងថ្លៃលើការហូបចុក ស្នាក់នៅ ដោយយកតម្លៃដូចធម្មតា ដើម្បីរួមចំណែកក្នុងការកាត់បន្ថយការចំណាយរបស់ប្រជាពលរដ្ឋបានមួយចំណែក»។

ពាក់ព័ន្ធនឹងបញ្ហានេះដែរ លោក ហង់ ជួនណារ៉ុន រដ្ឋមន្រ្តីក្រសួងអប់រំ យុវជន និងកីឡា ក៏បានអំពាវនាវ ដូចគ្នា ដល់ម្ចាស់អាជីវកម្មខាងលើ ជួយសម្រួលដល់បេក្ខប្រឡង កុំមានការឡើងថ្លៃចំណីអាហារ និងកន្លែងស្នាក់នៅ។ លោករដ្ឋមន្រ្តីអំពាវនាវបែបនេះ នៅក្នុងសន្និសីទសារព័ត៌មានស្តីពីការប្រឡងសញ្ញាបត្រមធ្យមសិក្សាទុតិយភូមិ ចំណេះទូទៅ និងបំពេញវិជ្ជា នៅថ្ងៃទី២០ ខែធ្នូ ឆ្នាំ២០២១។

សូមបញ្ជាក់ថា ការប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបនៅឆ្នាំនេះ ប្រព្រឹត្តិទៅនៅថ្ងៃទី ២៧ ខែធ្នូ ឆ្នាំ ២០២១ តាមទម្រង់ដូចឆ្នាំកន្លងមក ដោយមានបេក្ខជនបានដាក់ពាក្យប្រឡងសរុប ១១៥ ១៣៩ នាក់ ក្នុងនោះនារី ៦០ ៦៦១ នាក់ ចែកជា ២០៤ មណ្ឌល និង ៤ ៦៥១ បន្ទប់៕ សៅគ្រី