ព័ត៌មានជាតិ

ទូតសឹង្ហបុរីកោតសរសើរការងារបោសសម្អាតមីននៅកម្ពុជា

បានផុស

៦ years មុន

នៅ

ថ្ងៃអង្គារ ៨ ធ្នូ ២០២០

ដោយ

ភ្នំពេញ ៖ ឯកអគ្គរដ្ឋទូតសឹង្ហបុរីប្រចាំនៅកម្ពុជា បានសម្តែងនូវការកោតសរសើរ និងវាយតម្លៃខ្ពស់ចំពោះការងារបោសសម្អាតមីននៅកម្ពុជាក្នុងការចូលរួមគាំពារដល់សុខសន្តិភាព និងការអភិវឌ្ឍនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការកោតសរសើរនេះ បានធ្វើឡើងនៅក្នុងឱកាសដែលលោក Michael Tan ឯកអគ្គរដ្ឋទូតសឹង្ហបុរីប្រចាំនៅកម្ពុជាអញ្ជើញចូលជួប ជម្រាបលា លោកទេសរដ្ឋមន្ត្រី លី ធុជ អនុប្រធានទី១ អាជ្ញាធរ មីនកម្ពុជាកាលពីថ្ងៃទី៧ខែធ្នូឆ្នាំ២០២០ខណៈដែលលោកត្រូវបាន បញ្ចប់អាណត្តិ បេសកកម្ម ការទូតប្រចាំនៅកម្ពុជា។

លោក Michael Tanបានមានប្រសាសន៍ថា «ខ្ញុំនឹង ជម្រាបប្រាប់ឯកអគ្គរដ្ឋទូតសឹង្ហបុរីថ្មី ដែលត្រូវមកបំពេញបេសកកម្មការទូតបន្តវេនពីខ្ញុំឲ្យបន្តផ្តល់កិច្ចសហប្រតិបត្តិការឲ្យកាន់តែល្អប្រសើរបន្ថែមទៀតលើវិស័យសកម្មភាពមីននៅកម្ពុជា»។

ឯកអគ្គរដ្ឋទូតបានថ្លែងអំណរគុណដល់ប្រជាជន និងរាជរដ្ឋាភិបាលកម្ពុជា ដែលបានផ្តល់នូវកិច្ច សហប្រតិបត្តិការ និងគាំទ្រចំពោះបេសកកម្មការទូតរបស់ខ្លួននៅកម្ពុជានាពេលកន្លងមក។

ជាការឆ្លើយតបលោកទេសរដ្ឋមន្ត្រី លី ធុជ បានថ្លែងអំណរ គុណដល់ប្រទេសសឹង្ហបុរី ដែលបានចូលរួមជាមួយរាជ រដ្ឋាភិបាលកម្ពុជា លើកិច្ចសហប្រតិបត្តិការ កសាងធនធានមនុស្ស ការអភិវឌ្ឍសេដ្ឋកិច្ច និងពាណិជ្ជកម្ម ជាដើម។

ជាងនេះសិង្ហបុរីគឺជាប្រទេសមួយក្នុងចំណោមប្រទេសជាសមាជិកអាស៊ា បាន ចូលរួមផ្តល់នូវកាករដឹកនាំគ្រប់គ្រង និងគាំទ្រយ៉ាងសកម្មដល់ មជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC)។

លោកទេសរដ្ឋមន្ត្រីបានបង្ហាញនូវក្តីរំពឹងដែរថាឯកអគ្គរដ្ឋទូតថ្មីសិង្ហបុរីនឹងបន្តគាំទ្រដល់មជ្ឈមណ្ឌលតំបន់អាស៊ានសម្រាប់សកម្មភាពមីន (ARMAC) បានកាន់តែសកម្មឡើងថែមទៀត ក្នុងការរួមគ្នា ជួយដល់ប្រទេសនានាក្នុងអាស៊ាន ដើម្បីសម្អាតមីន និងគ្រាប់មិនទាន់ផ្ទុះនានា ដែលភាគច្រើនស្ថិតនៅក្នុងអតីតតំបន់សង្គ្រាម។

លោកទេសរដ្ឋមន្ត្រីក៍បាន ជម្រាបជូនអំពីកិច្ចខិតខំប្រឹងប្រែងរបស់កម្ពុជា ក្នុងការខិតខំធ្វើយ៉ាងណាឲ្យកម្ពុជាគ្មានមីននៅឆ្នាំ២០២៥ខាងមុខ។

លោកទេសរដ្ឋមន្ត្រីក៏ថ្លែងអំណរគុណ ប្រទេសជាមិត្ត ដៃគូអភិវឌ្ឍន៍ បណ្តាអង្គការជាតិអន្តរជាតិនានាដែលបានចូលរួមយ៉ាងសកម្មជាមួយរាជរដ្ឋាភិបាលក្នុងបេសកកម្មបោសសំអាតមីននៅកម្ពុជាដើម្បីសង្គ្រោះជីវិត កាត់បន្ថយគ្រោះថ្នាក់ និងលើកកម្ពស់សុវត្ថិភាព ជីវភាពរស់នៅរបស់ប្រជាពលរដ្ឋកម្ពុជា ឲ្យបានល្អប្រសើរជាលំដាប់ រួមចំណែកស្តារនិងអភិវឌ្ឍសេដ្ឋកិច្ចជាតិ ឲ្យកាន់តែរុងរឿងឆាប់រហ័សថែមទៀត៕
ដោយ ៖ សំអឿន