ឃាត់ខ្លួន​ អ្នក​សារព័ត៌មាន​ ៣ នាក់​ ពីបទញុះ​ញង់ឱ្យប្រជាពលរដ្ឋតវ៉ាទាម​ទារដីតំបន់ ៣ ស្រុក​កំពង់លែង

សមត្ថកិច្ច នៃស្នងការដ្ឋាននគរបាលខេត្តកំពង់ឆ្នាំង នៅព្រឹកថ្ងៃទី ០៨ ខែមករា ឆ្នាំ២០២២ បានឲ្យដឹងថា បុរសចំនួន៥​នាក់ក្នុងនោះជាអ្នកសារព័ត៌មានចំនួន ៣នាក់ និងមិត្តភ័ក្តិកចំនួន ២នាក់ទៀតត្រូវបានសមត្ថកិច្ចឃាត់ខ្លួន កាលពីថ្ងៃ ទី០៦ និងថ្ងៃទី០៧ ខែមករា ឆ្នាំ២០២២ ដោយបានចោទប្រកាន់ពីបទញុះញ៉ុងឲ្យប្រជាពលរដ្ឋតវ៉ាទាមទារដីតំបន់៣ នៅក្នុងស្រុកកំពង់លែង ខេត្តកំពង់ឆ្នាំង។

អ្នកសារព័ត៌មានទាំង៣នាក់ដែលត្រូវសមត្ថកិច្ចឃាត់ខ្លួនរួមមាន៖

១.ឈ្មោះ សាំង ចាន់ថន (ហៅសាំង សុង) ភេទប្រុស អាយុ៤៦ឆ្នាំ អង្គភាពសារព័ត៌មាន MCTV មានអាស័យដ្ឋានរស់នៅរាជធានីភ្នំពេញ។

២. ឈ្មោះ អ៊ុក ប៉ារ៉ាឌី ភេទប្រុស អាយុ ៣៤ ឆ្នាំ អង្គភាពសារព័ត៌មាន ក្រៀល Hot News មានអាស័យដ្ឋានរស់នៅរាជធានីភ្នំពេញ។ ត្រូវបានចាប់ខ្លួននៅចំណុចទំនប់អូរត្រាវនិងទំនប់ខ្នាយទោល នៅក្នុងភូមិគុយ និងភូមិប្រាសាទ ឃុំដារ ស្រុកកំពង់លែង។

៣. ឈ្មោះ កែវ ហួ ភេទប្រុស អាយុ ៥៤ឆ្នាំ ជាអ្នកសារព័ត៌មាន SBT POST មានអាស័យដ្ឋាន រស់នៅភូមិត្រពាំងបី សង្កាត់ផ្សារឆ្នាំង ក្រុងកំព ង់ឆ្នាំង ត្រូវបានឃាត់ខ្លួននៅក្នុងក្រុងកំពង់ឆ្នាំងនីព្រឹកថ្ងៃទី ០៧ ខែមករាឆ្នាំ២០២២ បន្ទាប់ពីបានឡាយព័ត៌ មាននូវសកម្មភាពប្រជាពលរដ្ឋនៅ ក្នុងឃុំច្រណូក តវ៉ាទាមទារដីតំបន់ ៣ នៅក្នុងស្រុកកំពង់លែង។

ចំណែកជនសង្ស័យ ២នាក់ទៀត ជាបក្ខពួកដែលបានរងការចោទ ប្រកាន់ពីបទញុះញ៉ុងដូចគ្នា គឺ១ ឈ្មោះ ប្រាក់សង្ហារ និង ២ឈ្មោះ ឈួន គង់តារា។

ជនសង្ស័យទាំង ៥ នាក់ខាងលើត្រូវបានសមត្ថកិច្ចបញ្ជូនខ្លួនរួម និងអាវុធខ្លី១ដើមផងដែរ ទៅកាន់សាលាដំបូងខេត្តកំពង់ឆ្នាំង នៅព្រឹកថ្ងៃទី ៨ ខែមករា ឆ្នាំ២០២២នេះ ដើម្បីបន្តនិតិវិធីច្បាប់៕

អត្ថបទ៖ ឈៀងថារិទ្ធ