អ៊ុំសាច់ថ្លៃចាប់រំលោភក្មួយស្រី២នាក់បានសម្រេចជាច្រើនលើក

បុរសម្នាក់ត្រូវជាអ៊ុំសាច់ថ្លៃរបស់ក្មេងស្រីរងគ្រោះ ត្រូវបានកម្លាំងប៉ុស្តិ៍នគរបាល​រដ្ឋបាល​តៃក្រោម ធ្វើការឃាត់ខ្លួន បន្ទាប់រងការចោទប្រកាន់ថា បានចាប់រំលោភលើក្មួយស្រីរបស់​ខ្លួន២​នាក់បាន​សម្រេចក្នុងម្នាក់ៗចំនួន២លើក។

ការឃាត់ខ្លួននេះ បានធ្វើឡើងកាលពីវេលា​ម៉ោង១៧និង៤០នាទី ថ្ងៃទី១៣ ខែកុម្ភៈ ឆ្នាំ២០២២ នៅ​ចំណុច​​ភូមិកោះអណ្ដែត​ ឃុំ​តា​តៃ​ក្រោម​ ស្រុក​កោះកុង ​ខេត្តកោះកុង​ បន្ទាប់សមត្ថកិច្ចបានទទួល​ពាក្យ​បណ្ដឹងពីក្មេងស្រីរងគ្រោះ។

ជនសង្ស័យមានឈ្មោះ ស៊ិន​ ធឿន ភេទ​ប្រុស អាយុ៤២ឆ្នាំ រស់នៅ​ភូមិ​​​កោះអណ្ដែត​ ឃុំ​តា​តៃ​ក្រោម​ ស្រុក​កោះកុង ​ខេត្តកោះកុង។ ចំណែកក្មេងស្រីរងគ្រោះមានពីរនាក់ឈ្មោះ ខ ស ព ភេទ​ស្រី​អាយុ​១៣​​ឆ្នាំ ​ជនជាតិខ្មែរ និង​ឈ្មោះ​ ហ ស ន ភេទ​ស្រី​អាយុ១២​ឆ្នាំ ជនជាតិខ្មែរ។ អ្នកទាំងពីររស់នៅភូមិ ឃុំ ជាមួយជនសង្ស័យ។

យោងតាមពាក្យបណ្ដឹងរបស់ជនរងគ្រោះបានបញ្ជាក់ថា ជនសង្ស័យឈ្មោះ សិន ធឿន ត្រូវជាអ៊ុំថ្លៃ បាន​ចាប់រំលោភ​ខ្លួនបានសម្រេចម្នាក់ពីរដង។ ក្រោយចាប់ខ្លួន ជនសង្ស័យបានសារភាពថា ខ្លួន​ពិតជា​បាន​ចាប់រំលោភក្មេងស្រី​ទាំងពីរ​នាក់​នោះបានសម្រេចពិតប្រាកដ​មែន។​

បន្ទាប់ពីសួរនាំ ជនសង្ស័យត្រូវបានបញ្ជូនទៅ​អធិការ​ដ្ឋាន​នគរបាល​ស្រុក​កោះកុង​ ដើម្បីកសាង​សំណុំរឿងបញ្ជូនទៅការិយាល័យ​កណ្ដាលជួញដូរ​មនុស្ស​ និង​ការពារ​អនីតិជន ដើម្បី​ចាត់ការ​តាម​នីតិវិធី​បន្ត​៕

អត្ថបទ៖ សុខុម​