សមត្ថកិច្ចចាប់បញ្ជូនបុរសម្នាក់ទៅតុលាការ ក្រោយរកឃើញប្រព្រឹត្តករណីរំលោភ និងចែកចាយរូបភាពអាសអាភាសរបស់កុមារ  

ក្រោយរកឃើញថា បានប្រព្រឹត្តបទល្មើសរំលោភសេពសន្ថវៈ ជាមួយនឹងការប្រើប្រាស់បណ្តាញតេឡេក្រាម ដើម្បីផលិត កាន់កាប់ និងចែកចាយរូបភាពអាសអាភាសរបស់កុមារ បុរសវ័យ៤៣​ឆ្នាំម្នាក់ត្រូវបានកម្លាំងសមត្ថកិច្ចចម្រុះចុះឃាត់ខ្លួន និងបញ្ជូនទៅកាត់ទោសនៅតុលាការ។ នេះបើតាមអង្គភាពការពារកុមារ CPU ឱ្យដឹងកាលពីថ្ងៃទី១​ ខែធ្នូ ឆ្នាំ២០២៥។

តាមប្រភពខាងលើ បន្ទាប់ពីការស៊ើបអង្កេតរបស់ក្រុមការងារចម្រុះ FOXTROT25 ដែលមានសមាសភាពពីកងកម្លាំងនគរបាលជាតិ រួមមាននាយកដ្ឋាននគរបាលប្រឆាំងការជួញដូរមនុស្ស និងការពារអនីតិជន ស្នងការដ្ឋាននគរបាលខេត្តកំពង់ឆ្នាំង ការិយាល័យសន្តិសុខមាតុភូមិ (HSI) នៃស្ថានទូតសហរដ្ឋអាមេរិក និងអង្គភាពការពារកុមារ បានរកឃើញរូបភាពអាសអាភាសលើកុមារកម្ពុជា ត្រូវបានផលិត និងបង្ហោះទៅលើប្រព័ន្ធអនឡាញ ដោយបុរសជាជនសង្ស័យខាងលើ ដែលរស់នៅខេត្តកំពង់ឆ្នាំង។

បច្ចុប្បន្ន បុរសជាជនសង្ស័យត្រូវបានសមត្ថកិច្ចឃាត់ខ្លួន និងបញ្ជូនទៅផ្តន្ទាទោសតាមច្បាប់នៅសាលាដំបូងខេត្តកំពង់ឆ្នាំង ពីបទរំលោភសេពសន្ថវៈមានស្ថានទម្ងន់ទោស និងបទផលិតចែកចាយរូបភាពអាសអាភាសលើកុមារ។

លោក ជេមស៍ ម៉ាខេប (James McCabe) នាយកអង្គភាពការពារកុមារ (CPU) បានលើកឡើងថា ជនសង្ស័យនេះបង្កហានិភ័យធ្ងន់ធ្ងរដល់កុមាររងគ្រោះច្រើននាក់។ ក្រុមការងារចម្រុះ FOXTROT25 ក៏បានព្រមានចំពោះអ្នកផលិតរូបភាពអាសអាភាសលើកុមារកម្ពុជា ហើយចែកចាយទៅតាមប្រព័ន្ធអនឡាញ សមត្ថកិច្ចនឹងឆ្លើយតបដោយបើកការស៊ើបអង្កេត និងឃាត់ខ្លួនបុគ្គលដែលប្រព្រឹត្តនោះ៕