រដ្ឋមួយនៅអាមេរិក នឹងចាប់គ្រៀវ អ្នករំលោភបំពានផ្លូវភេទអនីតិជន

សេចក្តីព្រាងច្បាប់ ដែលនឹងអនុញ្ញាតឲ្យចាប់គ្រៀវឧក្រិដ្ឋជន រំលោភបំពានផ្លូវភេទអនីតិជនអាយុក្រោម១៣ឆ្នាំ ពេលនេះត្រូវបានអនុម័តដោយសមាជិកសភារដ្ឋ Louisiana ហើយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សេចក្តីព្រាងច្បាប់លេខ៣៧១ ត្រូវបានអនុម័តដោយសំឡេងគាំទ្រយ៉ាងលើសលប់ ពីសំណាក់សមាជិកសភានៅថ្ងៃចុងក្រោយនៃសម័យប្រជុំនីតិបញ្ញត្តិ កាលពីដើមសប្តាហ៍ ហើយឥឡូវនឹងបញ្ជូនបន្តទៅអភិបាលរដ្ឋ Louisiana លោក Jeff Landry ដើម្បីពិនិត្យនិងសម្រេច។

ប្រសិនបើលោក Landry ចុះហត្ថលេខាឲ្យវាក្លាយទៅជាច្បាប់ពេញលក្ខណៈផ្លូវការមែននោះ Louisiana នឹងក្លាយជារដ្ឋដំបូងគេរបស់អាមេរិក ដែលផ្តល់សិទ្ធឲ្យចៅក្រម ដាក់ទោសមនុស្សដោយការគ្រៀវ។ 

តាមសេចក្តីរាយការណ៍របស់ USA Today, សេចក្តីព្រាងច្បាប់នេះ ផ្តល់សិទ្ធិឲ្យចៅក្រមកំណត់ការកាត់ទោសប្រឆាំងនឹងជនល្មើស ដែលត្រូវបានផ្តន្ទាទោសពីបទរំលោភបំពានផ្លូវភេទធ្ងន់ធ្ងរជាពិសេសលើអនីតិជនអាយុក្រោម១៣ឆ្នាំ, ឧក្រិដ្ឋកម្មធ្ងន់ធ្ងរប្រឆាំងនឹងធម្មជាតិ ឬការសាហាយស្មន់។

ការគ្រៀវនឹងធ្វើឡើងនៅក្នុងពន្ធនាគារ ដោយវេជ្ជបណ្ឌិតដែលចាត់តាំងពីនាយកដ្ឋានសុវត្ថិភាពសាធារណៈនិងកែប្រែ ហើយយោង​តាម​ច្បាប់​នេះ ជនណាមិន​គោរព​តាម​ដីកា​របស់​តុលាការ​សម្រាប់​ការគ្រៀវ ​នឹង​ត្រូវបន្ថែមទោសជាប់​ពន្ធនាគារ​ពី ៣ ទៅ ៥​ឆ្នាំទៀត ពី​លើ​ទោស​ដាក់​ពន្ធនាគារ​ដែលមានស្រាប់។

តាមពិតទៅបច្ចុប្បន្នរដ្ឋ Louisiana ក៏មានច្បាប់គ្រៀវដែរ ប៉ុន្តែច្បាប់នោះគឺជាការគ្រៀវដោយប្រើសារធាតុគីមី ដែលត្រូវបានដាក់ឲ្យអនុវត្តចាប់តាំងពីឆ្នាំ២០០៨មកម្ល៉េះ។

ទោះបីជាយ៉ាងណាក៏ដោយ ចាប់តាំងពីឆ្នាំ២០១០ដល់២០១៩ រដ្ឋនេះ អនុវត្តការគ្រៀវដោយប្រើសារធាតុគីមីតែលើឧក្រិដ្ឋជនត្រឹមម្នាក់ពីរនាក់ប៉ុណ្ណោះ៕

អត្ថបទ៖ សុខ សុវណ្ណ

ចុចអាន៖ អ៊ីតាលី ស្នើឲ្យមានការប្រើថ្នាំគីមីក្រៀវអ្នកប្រព្រឹត្តបទល្មើសរំលោភ