បុណ្យ ៥យ៉ាង ពុទ្ធសាសនិកជឿថា អាចនាំក្ដីសុខចម្រើនដល់ជីវិត ក្នុងថ្ងៃឱបោសថសីល

រៀងរាល់ថ្ងៃឱបោសថសីល ជាទម្លាប់របស់ពលរដ្ឋខ្មែរ ក៏ដូចជាជាតិសាសន៍ផ្សេងទៀត ដែលគោរពប្រណិប័តព្រះពុទ្ធសាសនា តែងតែទៅវត្តវ៉ា ដើម្បីធ្វើបុណ្យនឹងព្រះសង្ឃ ព្រមទាំងបូជាដល់ព្រះពុទ្ធរូប។ ទម្លាប់បែបនេះ ព្រោះសាសនិកជឿជាក់ថា អាចនាំបុណ្យកុសលដល់ខ្លួនឯង គ្រួសារ និងអ្នកចែកឋានទៅលោកខាងមុខ។ មិនតែប៉ុណ្ណោះ ​ពុទ្ធបរិស័ទ តែងតែបួងសួងសុំសេចក្ដីសុខពីវត្ថុស័ក្តិសិទ្ធិមិនដែលខាន រាល់វេលាណាដែលបានទៅធ្វើបុណ្យនៅថ្ងៃសីល។

​ខាងក្រោមជាជំនឿអំពីការធ្វើបុណ្យ ​៥យ៉ាង ដែលគេជឿថា អាចផ្ដល់សេចក្ដីសុខ សេចក្ដីចម្រើន ក្នុងថ្ងៃឱបោសថសីល៖

១. ទៅវត្ត​ប្រគេនចង្ហាន់​ ផ្កាភ្ញី ធូប ទៀន ប្រេង និងគោម ដល់ព្រះសង្ឃ អាចជួយផ្ដល់​សំណាង សុភមង្គល និង​សម្រស់​ស្រស់ស្អាត។

២. ធ្វើទានដោយចែក​​ថ្នាំ​ពេទ្យ អាហារ និងទឹក​ផឹក នោះជីវិតនឹងពេញ​បរិបូរណ៍ដោយសុខភាព មិនទទួលរងពីជំងឺឈឺថ្កាត់ ហើយភារកិច្ចនានានឹង​ទទួល​បាន​ជំនួយពីអ្នកដទៃ។

៣. ធ្វើ​បុណ្យ​រំដោះ​សត្វ ជាបុណ្យកុសល​នឹង​នាំ​មក​នូវ​សេចក្តីសុខចម្រើន ជីវិតមានសំណាងភ្លឺថ្លា ទ្រព្យសម្បត្តិហូរចូល និងសុភមង្គលទ្វេដង។

៤. ​គោរពបូជា​ព្រះពុទ្ធ​រូប តាមជំនឿ នឹងជួយឱ្យជីវិតគ្រួសារទទួលបានភាពរីករាយ ព្រមទាំងជួយបំពេញបំណងប្រាថ្នាឱ្យសម្រេច។

៥. កាន់សីល ៥ ឬសីល ៨ នឹងជួយកាត់បន្ថយសំណាងអាក្រក់។

ទោះ​បី​ជា​ប្រិយមិត្ត​ធ្វើ​បុណ្យប្រភេទណាក៏ដោយ សូមធ្វើដោយចេតនាបរិសុទ្ធ នោះ​បុណ្យ​កុសលច្បាស់ជាកើតមានច្រើនៗជាក់ជាមិនខាន៕

អត្ថបទ៖ សន្យា

ចុចអាន៖ មេរៀន ៣ យ៉ាង ពុទ្ធសាសនិកខ្មែរ គួរអនុវត្តនៅថ្ងៃ «បុណ្យមាឃបូជា»

ចុចអាន៖ ជាពុទ្ធសាសនិកខ្មែរ គួរស្វែងយល់ពីពិធី «បុណ្យមាឃបូជា​»