ផ្លូវមួយខ្សែប្រវែង ៣០០ម៉ែត្រ ក្នុងសង្កាត់បាវិត ត្រូវបានកែលម្អ

ស្វាយរៀងៈ លោក លឹម សៀងហេង អភិបាលក្រុងបាវិត បានចុះពិនិត្យការជួសជុលផ្លូវមួយខ្សែប្រវែងជាង៣០០ម៉ែត្រ ស្ថិតក្នុងភូមិច្រកលាវ សង្កាត់បាវិត ក្រុងបាវិត ខេត្តស្វាយរៀង នៅថ្ងៃទី១២ ខែឧសភា ឆ្នាំ២០២២។

លោកអភិបាលក្រុង បានលើកឡើងថា ការកែលម្អពង្រីកផ្លូវនេះ តបតាមការស្នើរបស់ប្រជាពលរដ្ឋ ដែលលំបាកក្នុងការធ្វើដំណើរ។ លោក លឹម សៀងហេង បានបន្តទៀតថា ផ្លូវមួយខ្សែនេះពីមុនជាផ្លូវដីមានសភាពតូចចង្អៀតពិបាកក្នុងការធ្វើដំណើរ ហើយនៅរដូវវស្សា គឺមានទឹកដក់លិចផ្លូវដោយពុំមានផ្លូវទឹកហូរចេញនោះទេ ជាពិសេសសិស្សសាលាពិបាកធ្វើដំណើរទៅរៀន ជាដើម។

ដោយមើលឃើញពីការលំបាកនេះ អាជ្ញាធរ បានចាក់ក្រាលថ្មម៉ិច មានបណ្តោយប្រវែងជាង៣០០ម៉ែត្រ ទទឹង ប្រវែង ៨ ម៉ែត្រ ព្រមទាំងដាក់ប្រព័ន្ធលូបង្ហូរទឹកថែមទៀតផង។  ចំពោះថវិកាដែលត្រូវចំណាយក្នុងការជួសជុលផ្លូវនេះ គឺបានមកពីការចូលរួមរបស់សប្បុរសជន។

លោកអភិបាលក្រុង ក៏បានអំពាវនាវដល់បងប្អូនប្រជាពលរដ្ឋនៅពេលបានផ្លូវល្អហើយ ត្រូវចេះថែរក្សាឱ្យបានគង់វង្សយូរអង្វែង និងត្រូវចូលរួមគោរពច្បាប់ចរាចរណ៍ទាំងអស់គ្នា ជាពិសេសគឺចូលរួមអនុវត្តគោលនយោបាយភូមិឃុំមានសុវត្ថិភាព៕ ដោយ:ភក្ដី