លោក ពូទីន ថា អាមេរិក កំពុងតាំងខ្លួនជាអ្នកគ្រប់គ្រងផែនដី

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានចោទប្រកាន់សហរដ្ឋអាមេរិកថា កំពុងលេងសើចជាមួយព្រះ ដោយតាំងខ្លួនជាអ្នកគ្រប់គ្រងផែនដី។ លោកក៏បានថ្កោលទោសទណ្ឌកម្មរបស់បស្ចិមប្រទេសផងដែរ ដោយលោកហៅថា ឆ្កួតលីលា និង គ្មានការពិចរណា។

សុន្ទរកថា​​របស់មេដឹកនាំ​រុស្ស៊ីរូបនេះ បាន​កើត​ឡើង​នៅ​ក្នុង​សុន្ទរកថា​ដ៏​ក្ដៅ​គគុក​មួយ ​ក្នុង​វេទិកា​សេដ្ឋកិច្ច​នា​ទីក្រុង​ St Petersburg ​កាលពី​ថ្ងៃ​សុក្រទី១៧ខែមិថុនា។

ស្របពេលជាមួយគ្នានោះដែរ ប្រធានាធិបតីរុស្ស៊ីបានព្រមានថា សណ្តាប់ធ្នាប់ពិភពលោកនឹងមិនវិលត្រលប់ទៅរករបៀបវារៈ មុនពេលសង្គ្រាមអ៊ុយក្រែនផ្ទុះឡើងវិញនោះទេ។

លោកពូទីននិយាយ “យើង​ជា​មនុស្ស​ខ្លាំង ហើយ​អាច​ជម្នះ​រាល់​បញ្ហា​ប្រឈម។ ដូចជាដូនតារបស់យើងដែរ យើងនឹងដោះរាល់ស្រាយបញ្ហា ប្រវត្តិសាស្ត្ររាប់ពាន់ឆ្នាំនៃប្រទេសរបស់យើង បាននិយាយអំពីរឿងនេះ”។

មេដឹកនាំវ័យ ៦៩ ឆ្នាំរូបនេះបន្តថា “សហរដ្ឋអាមេរិក ចាត់ទុកខ្លួនឯងជាអ្នកនាំសាររបស់ព្រះនៅលើផែនដី ហើយប្រទេសរុស្ស៊ី កំពុងចូលខ្លួននៅក្នុងលំដាប់ពិភពលោកថ្មីមួយ ដែលច្បាប់នឹងត្រូវបានកំណត់ដោយរដ្ឋដែលមានអំណាចនិងអធិបតេយ្យភាព”។

ទន្ទឹមនោះ លោកប្តេជ្ញាបន្តប្រតិបត្តិការយោធាពិសេសនៅក្នុងប្រទេសអ៊ុយក្រែន។ លោកទទូចថា ការសម្រេចចិត្តលុកលុយអ៊ុយក្រែនគឺ ដោយបង្ខំ និងលំបាក ប៉ុន្តែត្រូវបង្ខំចិត្ត និងជារឿងចាំបាច់។

លោកបានហៅយុទ្ធនាការយោធារបស់ខ្លួនក្នុងប្រទេសអ៊ុយក្រែន ថាជាទង្វើរបស់រុស្ស៊ីក្នុងនាមជារដ្ឋអធិបតេយ្យមួយ ដែលមានសិទ្ធិការពារសន្តិសុខរបស់ខ្លួន ហើយបានចោទប្រកាន់លោកខាងលិចអំពីការដណ្តើមកាន់កាប់ទឹកដីអ៊ុយក្រែនយ៉ាងសកម្ម៕

ប្រែសម្រួល៖ Vann Vann

ប្រភព៖ News Delivers

ចុចអាន៖ អាមេរិក ផ្អាកការលក់យន្តហោះគ្មានមនុស្សបើកទំនើបទៅឲ្យអ៊ុយក្រែន ព្រោះខ្លាចធ្លាក់ដល់ដៃរុស្ស៊ី