គ្រូបង្វឹកលោក Conor Nestor ​ថា ជួបវិសាខា​ល្ងាចនេះនឹងក្លាយ​ជាភារកិច្ច​ដ៏លំបាកបំផុត​សម្រាប់ក្រុម ​

​គ្រូបង្វឹកនៃក្លិបបាល់ទាត់ព្រះខ័នរាជស្វាយរៀង លោក Conor​ Nestor បានបង្ហើប​ឱ្យដឹងថា ជួបវិសាខាល្ងាច​នេះនឹងក្លាយជាភារកិច្ចដ៏លំបាកបំផុតសម្រាប់ក្រុម ក្នុងជំនួបសប្ដាហ៍ទី១៤ ឬជាសប្ដាហ៍ចុងក្រោយជុំទី២ នៃលីគរសៀលនេះ។

​លោក Conor Nestor បានឱ្យដឹងដូច្នេះថា៖​ «បើយើងក្រឡេកមើលទៅលើ​ទម្រង់លេងរបស់​គេនៅ​ក្នុង AFC Cup វាបានបង្ហាញពីភាពខ្លាំងរបស់​ពួកគេ ហើយគេមានកីឡាករ​ល្អ ២នាក់ដែលលេង​បាន​គ្រប់​តំបន់។ ជាក្រុមដែលមានកីឡាកររឹងមាំជាងគេនៅកម្ពុជា ដោយផ្អែកទៅលើគុណភាព និងតិចនិក ដូច្នេះវានឹងក្លាយជាភារកិច្ចដ៏លំបាកបំផុតសម្រាប់យើង យើងរំភើប និងទន្ទឹងរង់ចាំការប្រកួត ហើយសង្ឃឹមថានឹងធ្វើឱ្យកីឡដ្ឋានពេញ»។

«គ្រប់គ្នានៅក្នុងគឺរួចរាល់ ១០០ភាគរយ ចំពោះការប្រកួត គ្រប់គ្នាធ្វើបានល្អនៅពេលហ្វឹកហាត់ អ៊ីចឹងយើងសង្ឃឹមថានឹងបន្តធ្វើបានល្អនៅក្នុងការប្រកួត»។ គ្រូបង្វឹកសញ្ជាតិអៀរឡង់ខាងជើងបញ្ជាក់ពីការរួចរាល់។

គួររំលឹកថា កាលពីជើងទី១ ព្រះខ័នរាជស្វាយរៀង បានយកឈ្នះវិសាខា ១-២ នៅកីឡដ្ឋានព្រីសន៍។ ខណៈការប្រកួតល្ងាចនេះ នឹងធ្វើឡើងនៅវេលាម៉ោង ៣៖៤៥នាទីរសៀលនេះ នាកីឡដ្ឋានខេត្តស្វាយរៀង វិញម្ដង៕ 

អត្ថបទ៖ មន្នីរ័ត្ន