កីឡា

លោក Conor Nestor សង្ឃឹម បឹងកេត ឈ្នះពានសម្តេចតេជោឆ្នាំនេះ

បានផុស

១ year មុន

នៅ

ថ្ងៃអង្គារ ១៣ ឧសភា ២០២៥

ដោយ

លោកគ្រូ Conor Nestor សង្ឃឹមក្លិបបាល់ទាត់ បឹងកេត ឈ្នះពានរង្វាន់សម្តេចអគ្គមហាសេនាបតីតេជោ ហ៊ុន សែន ក្នុងរដូវកាលនេះ បន្ទាប់ពីពួកគេបានអស់ឱកាសក្នុងលីគកំពូលកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងបទសម្ភាសជាមួយសារព័ត៌មាន«កម្ពុជាថ្មី» លោក Conor Nestor គ្រូបង្វឹកបឹងកេត បានលើកឡើងថា ៖«ព្រះខ័នរាជស្វាយរៀងឈ្នះពាន៣កាលពីរដូវកាលមុន។ វាអាចទៅរួចដែលពួកគេអាចឈ្នះបន្តទៀត ប៉ុន្តែតាមពិតទៅ ខ្ញុំសង្ឃឹមថា ពួកគេមិនឈ្នះពានសម្តេចតេជោឆ្នាំនេះទេ ពីព្រោះខ្ញុំសង្ឃឹមបឹងកេតឈ្នះវិញ។ យ៉ាងណា អ្វីៗមិនអាចមើលឃើញទេ វាត្រូវការនិរន្តរភាព និងគុណភាពខ្ពស់ជាក់លាក់។ ខ្ញុំគិតថា វាត្រូវការរួមបញ្ចូលគ្នារវាងកីឡាករក្នុងស្រុក និងបរទេស»។

ការប្រកួត ព្រះខ័នរាជស្វាយរៀង និង បឹងកេត កាលពីជើងទី១

បឹងកេត មិនទាន់បានឡើងទៅកាន់វគ្គផ្តាច់ព្រ័ត្រ ពានរង្វាន់សម្តេចតេជោទេ ដោយត្រូវប្រកួតជើងទី២ ជាមួយ ព្រះខ័នរាជស្វាយរៀង វេលាម៉ោង៦ល្ងាច ថ្ងៃទី១៤ ខែឧសភានេះ នៅទឹកដីខេត្តស្វាយរៀង ដើម្បីកាត់សេចក្តីថាតើក្រុមណាឡើងទៅវគ្គផ្តាច់ព្រ័ត្រជួប ភ្នំពេញក្រោន។ កាលពីជើងទី១ បឹងកេត បានចាញ់ ព្រះខ័នរាជស្វាយរៀង ១-០ នៅពហុកីឡដ្ឋានជាតិអូឡាំពិក។

បឹងកេត បានបង្ហាញគុណភាពលេងគួរឲ្យចាប់អារម្មណ៍នាប៉ុន្មានប្រកួតចុងក្រោយ ដោយកីឡាករក្នុងស្រុក និងកីឡាករបរទេសបានយល់ចិត្តគ្នាច្រើន។ ក្នុងរដូវកាលនេះ ពួកគេមានការផ្លាស់ប្តូរច្រើនមែនទែនទាំងកីឡាករ និងគ្រូបង្វឹក ប៉ុន្តែលទ្ធផលនៅតែមិនទាន់ល្អប្រសើរខ្លាំង។

សូមបញ្ជាក់ថា ការប្រកួតវគ្គផ្តាច់ព្រ័ត្រ ពានសម្តេចតេជោ រដូវកាលនេះធ្វើនៅពហុកីឡដ្ឋានជាតិ មរតកតេជោ ដោយសំបុត្រ ត្រូវបានបើកលក់កាលពីថ្ងៃទី១២ ខែឧសភា ឆ្នាំ២០២៥។ សំបុត្រ ប្រភេទ A តម្លៃ ១៧,០០០រៀល មានឱកាសឈ្នះពានរង្វាន់រថយន្ត (១រង្វាន់) និងសំបុត្រ ប្រភេទ B តម្លៃ ១០,០០០រៀល មានឱកាសឈ្នះរង្វាន់ម៉ូតូ (៣រង្វាន់)៕

អត្ថបទ៖ វីរបុត្រ