ក្រុមអ្នកតវ៉ាស្រីដោះអាវចូលរំខានដល់អធិការបតី អាល្លឺម៉ង់ ថ្លែងសុន្ទរកថា

ក្រុមអ្នកតវ៉ា​ស្រីបានដោះអាវ​រំខានដល់​អធិការបតី​អាល្លឺម៉ង Olaf Scholz ខណៈ​ដែល​លោក​​ត្រៀមថ្លែងសុន្ទរកថាបើកចំហរក្នុងព្រឹត្តិការណ៍ Open Day របស់រដ្ឋាភិបាលសហព័ន្ធនៅឯការិយាល័យ Chancellery ក្នុងទីក្រុងបែរឡាំងកាលពីថ្ងៃអាទិត្យ ។

ក្រុមអ្នកតវ៉ាដែលដោះអាវបានរត់ចូលទៅរកលោក Olaf Scholz ជាមួយនឹងពាក្យស្លោកដែលសរសេរលើស្បែករបស់ពួកគេថា “GAS EMBARGO NOW” មុនពេលក្រុមសន្តិសុខចូលទៅឃាត់ពួកគេ ។

ហេតុការណ៍នេះកើតឡើង នៅពេលដែលការស្ទង់មតិបានរកឃើញថា ជនជាតិអាល្លឺម៉ង់ប្រហែល ២ ភាគ ៣ មិនសប្បាយចិត្តនឹងការងាររបស់មេដឹកនាំពួកគេ បន្ទាប់ពីមានវិបត្តិជាបន្តបន្ទាប់ ចាប់តាំងពីការចូលកាន់តំណែងក្នុងខែធ្នូ ជាពិសេសពាក់ព័ន្ធនឹងបញ្ហាដែលរុស្ស៊ីផ្អាកការផ្គត់ផ្គង់ឧស្ម័នធម្មជាតិទៅកាន់អឺរ៉ុបរយៈពេល ៣ ថ្ងៃនៅចុងខែនេះ តាមរយៈបំពង់បង្ហូរប្រេងដ៏សំខាន់ Nord Stream 1 របស់ខ្លួនចូលទៅក្នុងតំបន់ ។

បើយោងតាមការស្ទង់មតិដោយវិទ្យាស្ថាន Insa ឲ្យកាសែត Bild am Sonntag បានឲ្យដឹងថា មានតែ ២៥ ភាគរយប៉ុណ្ណោះនៃជនជាតិអាល្លឺម៉ង់ជឿជាក់ថា គណបក្សសង្គមប្រជាធិបតេយ្យរបស់លោក Olaf Scholz កំពុងបំពេញការងាររបស់គាត់បានល្អ ពោលធ្លាក់ចុះពី ៤៦ ភាគរយនៅក្នុងខែមីនា ។

ផ្ទុយទៅវិញ ៦២ ភាគរយនៃជនជាតិអាល្លឺម៉ង់គិតថា លោក Scholz ដែលធ្លាប់ជាឧបនាយករដ្ឋមន្ត្រីក្រោមមេដឹកនាំអភិរក្សនិយមជើងចាស់លោកស្រី Angela Merkel កំពុងធ្វើការងាររបស់គាត់កាន់តែយ៉ាប់ទៅៗ ពោលជាចំនួនកំណត់ត្រាអាក្រក់បំផុត បើធៀបនឹង ៣៩ ភាគរយនៅក្នុងខែមីនា ។

គួរបញ្ជាក់ថា ចាប់តាំងពីឡើងកាន់អំណាចមក លោក Olaf Scholz ជួបបញ្ហាជាច្រើន ជាពិសេសគឺការដោះស្រាយសង្រ្គាមនៅអ៊ុយក្រែន វិបត្តិថាមពល ការកើនឡើងអតិផរណា និងគ្រោះរាំងស្ងួតជាដើម ដែលទាំងអស់នេះបានរុញច្រានសេដ្ឋកិច្ចប្រទេសដ៏ធំបំផុតមួយរបស់អឺរ៉ុបឈានទៅរកវិបត្តិសេដ្ឋកិច្ច ៕

ប្រែសម្រួលដោយ ៖ ជីវ័ន្ត

ប្រភព ៖ Sky News

ចុចអាន ៖ លោក Joe Biden ពិភាក្សារឿងសំខាន់ចំនួន ២ ជាមួយមេដឹកនាំអឺរ៉ុប ៣ រូប