ព័ត៌មានជាតិ

ណាហ្គាវើលដ៍បេះដូងសប្បុរស ដំណើរការកម្មវិធីកសិកម្មសហគមន៍ជាមួយប្រជាកសិករស្រុកអង្គស្នូល

បានផុស

៤ years មុន

នៅ

ថ្ងៃពុធ ២៤ សីហា ២០២២

ដោយ

នៅថ្ងៃទី ២៤ ខែសីហា ឆ្នាំ ២០២២ នេះណាហ្គាវើលដ៍បេះដូងសប្បុរសដែលជាផ្នែកការងារសង្គមរបស់ក្រុមហ៊ុនណាហ្គាវើលដ៍ បានដំណើរការកម្មវិធីកសិកម្មសហគមន៍ជាមួយប្រជាកសិករជាច្រើនគ្រួសារ នៅក្នុងស្រុកអង្គស្នួល ខេត្តកណ្តាល។ កម្មវិធីដែលបានដំណើរការរួមមាន បច្ចេកទេសចិញ្ចឹមជន្លេន និងការបរិច្ចាគគ្រាប់ពូជបន្លែ។

កម្មវិធីទីមួយ គឺការផ្តល់សិក្ខាសាលាស្តីពីបច្ចេកទេសចិញ្ចឹមជន្លេន។ នៅពេលជន្លេនស៊ីរូបធាតុរលួយ (ដែលយកមកពីផ្ទះបាយ) លាមកគោ ឬចំបើងជាដើម ជន្លេននឹងបញ្ចេញមកវិញនូវលាមក ដែលមានសារធាតុចិញ្ចឹមជាច្រើន។ លាមកជន្លេនទាំងនោះ នឹងក្លាយជាជីធម្មជាតិ និងធ្វើឲ្យដីមានជីជាតិឡើងវិញ សម្រាប់ដំណាំ និងបន្លែ។ វិធីសាស្ត្រនេះ ជួយកាត់បន្ថយសំរាម និងកាត់បន្ថយការដុតវាចោល ដែលប៉ះពាល់ដល់បរិស្ថាន និងសុខភាព។ លើសពីនេះ ប្រជាកសិករចំណាយដើមទុនតិចបំផុតក្នុងការចិញ្ចឹមជន្លេន ហើយពួកគេក៏នឹងអាចលក់ជន្លេន ដើម្បីធ្វើជាចំណីត្រីដែលអាចបង្កើនប្រភពចំណូលបន្ថែមផងដែរ។

ប្រជាកសិករ ទទួលគ្រាប់ពូជបន្លែនៅក្នុងពិធីប្រគល់ និងទទួលដែលត្រូវបានធ្វើឡើងនៅសាលាស្រុកអង្គស្នួលក្រោមអធិបតីភាពលោក សាន វ៉ាន់ធុល អភិបាលរងនៃគណៈអភិបាលស្រុកអង្គស្នួល និងលោក ម៉ៅ សិទ្ធ ប្រធានការិយាល័យកសិកម្ម ធនធានធម្មជាតិ និងបរិស្ថាន

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កម្មវិធីទីពីរ គឺការបរិច្ចាគគ្រាប់ពូជបន្លែ។ នេះជាកម្មវិធីដែលបានមកពីការចូលរួមរបស់បុគ្គលិកណាហ្គាវើលដ៍ដែលពួកគេបានចូលរួមហាត់ប្រាណ ក្នុងអំឡុងពេលបិទខ្ទប់ដោយសារជំងឺកូវីដ-១៩កាលពីឆ្នាំមុន។ ចំនួនម៉ោង ឬចម្ងាយនៃការធ្វើលំហាត់ប្រាណរបស់ពួកគេ ដូចជា ការដើរ រត់ ឬជិះកង់ ជាដើម ត្រូវបានគណនាទៅជាចំនួនគ្រាប់ពូជបន្លែសម្រាប់យកទៅចែកជូនដល់ប្រជាពលរដ្ឋជាច្រើនគ្រួសារក្នុងស្រុកអង្គស្នួល។

ពលរដ្ឋដែលចូលរួមសិក្ខាសាលានៅកសិដ្ឋានណាហ្គា សិក្សាស្វែងយល់អំពី “របៀបប្រមូលផលដំឡូង និងការចិញ្ចឹមជន្លេនក្នុងពេលតែមួយ”

លោក Pern Chen នាយកគ្រប់គ្រងណាហ្គាវើលដ៍ បានឲ្យដឹងថា “នៅពេលបុគ្គលិកកាន់តែច្រើនចូលរួមហាត់ប្រាណមានន័យថា ពួកគេអាចរកគ្រាប់ពូជបន្លែបានកាន់តែច្រើនសម្រាប់ប្រជាកសិករក្នុងស្រុកអង្គស្នួល។ មានបុគ្គលិករបស់យើងជាច្រើនបានចូលរួមហាត់ប្រាណ និងរក្សារបៀបរស់នៅសកម្ម និងប្រកបដោយសុខភាពល្អ ក្នុងអំឡុងពេលបិទខ្ទប់។ ពួកគេបានខិតខំហាត់ប្រាណ ដើម្បីសុខភាពល្អផង និងជួយដល់សហគមន៍របស់ពួកគេផង”។

មន្ត្រីកសិដ្ឋានណាហ្គា បង្ហាញអំពីចំបើងសើម និងដីដែលនឹងត្រូវបានប្រែក្លាយទៅជាជីសរីរាង្គដោយជន្លេន

សូមបញ្ជាក់ថា សិក្ខាសាលាស្តីពីបច្ចេកទេសចិញ្ចឹមជន្លេន និងការបរិច្ចាគគ្រាប់ពូជបន្លែនេះ ត្រូវបានធ្វើឡើងនៅថ្ងៃទី ២០ ខែសីហានេះ នៅសាលាស្រុកអង្គស្នួល ក្រោមអធិបតីភាពលោក សាន វ៉ាន់ធុល អភិបាលរងនៃគណៈអភិបាលស្រុកអង្គស្នួល។ លោក សាន វ៉ាន់ធុល បានមានប្រសាសន៍ថា “យើងសូមថ្លែងអំណរគុណចំពោះ គំនិតផ្តួចផ្តើមដ៏មានសារសំខាន់នេះរបស់ណាហ្គាវើលដ៍បេះដូងសប្បុរសដែលផ្តល់ចំណេះដឹង និងប្រយោជន៍ជាច្រើនដល់ប្រជាពលរដ្ឋនៅក្នុងសហគមន៍របស់យើង។ ការបរិច្ចាគគ្រាប់ពូជបន្លែ នឹងអនុញ្ញាតឲ្យប្រជាពលរដ្ឋអាចដាំដុះ ដើម្បីបង្កើនប្រាក់ចំណូលបន្ថែម ខណៈដែលការចិញ្ចឹមជន្លេន គឺជាវិធីសាស្ត្រថ្មីជួយលើកកម្ពស់វិស័យកសិកម្មរបស់យើង”។

គួរបញ្ជាក់ថា ណាហ្គាវើលដ៍បេះដូងសប្បុរស ត្រូវបានបង្កើតឡើងក្នុងខែមីនា ឆ្នាំ ២០១៤ ដោយបុគ្គលិកដែលមានការគាំទ្រពីក្រុមហ៊ុន ដើម្បីលើកកម្ពស់ការធ្វើការស្ម័គ្រចិត្តសម្រាប់សង្គមកម្ពុជា ដោយផ្តោតទៅលើសសរស្តម្ភសំខាន់ ៤ គឺការលើកកម្ពស់វិស័យអប់រំ ការផ្សារភ្ជាប់ជាមួយសហគមន៍ ការអភិវឌ្ឍវិស័យកីឡា និងការគាំពារបរិស្ថាន។ មកដល់បច្ចុប្បន្ន មានប្រជាជនកម្ពុជាជាង ៤៦៣.០០០ នាក់បានទទួលប្រយោជន៍ពីកម្មវិធីទាំងនេះ៕

Related Topics:ណាហ្គាវើលដ៍

សេចក្ដីជូនដំណឹង៤ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា