លោក ពូទីន ថា គោលដៅរបស់ រុស្ស៊ី នៅ អ៊ុយក្រែន នឹងសម្រេចបានទាំង​ស្រុង

ប្រធានាធិបតីរុស្ស៊ី លោក វ្ល៉ាឌីមៀរ ពូទីន បាននិយាយកាលពីថ្ងៃពុធថា គ្មានការងឿងឆ្ងល់ទេ គោលដៅទាំងអស់ដែលយើងកំណត់នៅក្នុងប្រទេសអ៊ុយក្រែន នឹងត្រូវសម្រេចបានទាំងស្រុង ។

លោក ពូទីន បាននិយាយក្នុងអំឡុងពេលត្រួតពិនិត្យមេទាហានកំពូលៗរាប់ពាន់នាក់សម្រាប់ “ប្រតិបត្តិការយោធាពិសេស” នៅអ៊ុយក្រែនតាមអ៊ីនធឺណិតថា ការខាតបង់ដែលភាគីទាំងពីរបានទទួលរងនៅលើសមរភូមិអ៊ុយក្រែន គឺជា “សោកនាដកម្មធម្មតា” ប៉ុណ្ណោះ ហើយទោះ​យ៉ាង​ណា​ ​ភាគីរុស្ស៊ី​មិន​ត្រូវ​បន្ទោសចំពោះបញ្ហានេះនោះ​ទេ ។

។

ពាក់ព័ន្ធនឹងបញ្ហានេះដែរ រដ្ឋមន្ត្រីការពារជាតិលោក Sergei Shoigu បាននិយាយថា ដើម្បីសម្រេចបាននូវគោលដៅនេះ យើងនឹងត្រូវការពង្រឹងកម្លាំងប្រយុទ្ធដែលមានសមាជិកចំនួន ១.១ លាននាក់ ហើយលោក​ក៏បាន​ស្នើ​ឲ្យ​មាន​ការ​ពង្រីកកម្លាំងនេះបន្ថែមទៀត​ជាង ៣០ ភាគរយ​ ពោលឡើងដល់ ១.៥ លាន​នាក់ ។

លោក Shoigu បាននិយាយថា “កិច្ចការអាទិភាពសម្រាប់ឆ្នាំក្រោយគឺត្រូវបន្តប្រតិបត្តិការយោធាពិសេស រហូតដល់កិច្ចការរបស់យើងត្រូវបានបញ្ចប់” ។

គួរបញ្ជាក់ថា រហូតមកដល់ពេលនេះសង្គ្រាមលុកលុយរបស់រុស្ស៊ីលើអ៊ុយក្រែនដែលលោក ពូទីន ចាត់ទុកជា ប្រតិបត្តិការយោធាពិសេស បានអូសបន្លាយពេលជិត ១០ ខែមកហើយ បន្ទាប់ពីផ្ទុះការវាយលុកកាលពីថ្ងៃទី២៤ ខែកុម្ភៈ ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ មកដឹងសីតុណ្ហភាពខែរងានៅ អ៊ុយក្រែន ខណៈកំពុងខ្វះការផ្គត់ផ្គង់ឧស្ម័ន​កម្ដៅខ្លួន