គ្រោះថ្នាក់អគ្គិភ័យ ឆ្នាំ២០២២ កើតឡើង ៦១៨លើក មនុស្សស្លាប់ និងរបួសជិត ៨០នាក់

លោកឧត្តមសេនីយ៍ឯក នេត វន្ថា ប្រធាននាយកដ្ឋាននគរបាលបង្ការ ពន្លត់អគ្គិភ័យ និងសង្គ្រោះ នៃអគ្គស្នងការដ្ឋាននគរបាលជាតិ បានឱ្យដឹងថា ក្នុងឆ្នាំ២០២២នេះ មានគ្រោះថ្នាក់អគ្គិភ័យកើតឡើងនៅទូទាំងប្រទេស ចំនួន ៦១៨លើកបណ្តាលឱ្យមនុស្សស្លាប់ចំនួន ១៧នាក់ រងរបួសចំនួន ៥៩នាក់ ឆេះផ្ទះចំនួន ៦៩៧ខ្នង និងតូបចំនួន ១០៩តូប។

ថ្លែងបើកការធ្វើលំហាត់សមយុទ្ធពន្លត់អគ្គិភ័យ និងសង្គ្រោះ នៅអគារស្ថាបនា ដែលមានទីតាំងស្ថិតនៅតាមបណ្ដោយមហាវិថីព្រះនរោត្តម ក្នុងខណ្ឌដូនពេញ រាជធានីភ្នំពេញ នៅព្រឹកថ្ងៃទី២៦ ធ្នូ នេះ ឧត្តមសេនីយ៍ឯក នេត វន្ថា បានបន្តថា ចំនួនគ្រោះអគ្គិភ័យក្នុងឆ្នាំ២០២២នេះ បើប្រៀបធៀបទៅនឹងឆ្នាំ២០២១ឃើញថា មានការចយចុះគួរឱ្យគត់សម្គាល់ ខណៈឆ្នាំ២០២១មានថ្នាក់អគ្គិភ័យបានកើតឡើងចំនួន ៧០លើក បានបណ្ដាលឱ្យមនុស្សស្លាប់ ចំនួន ២៤នាក់ របួស ៣៥នាក់។

ឧត្តមសេនីយ៍ឯក នេត វន្ថា បានបន្តទៀតថា ដើមចមដែលនាំឱ្យមានគ្រោះអគ្គិភ័យនេះ គឺបណ្ដាលមកពី អគ្គិសនី ៤១,៥៥ ភាគរយ, ប្រើប្រាស់ភ្លើង ៣៨,២៤ ភាគរយ និងក្ដាប់មិនបាន ២០,២១ ភាគរយ។

ឧត្តមសេនីយ៍ឯក នេត វន្ថា បានសំណូមពរដល់អ្នកគ្រប់គ្រងគ្រឹះស្ថានមីក្រូហិរញ្ញវត្ថុថ្នាក់ជាតិ និងថ្នាក់ក្រោមជាតិទាំងអស់ ត្រូវអនុវត្តវិធានការបង្ការ ពន្លត់អគ្គិភ័យនេះ ឱ្យមានប្រសិទ្ធភាពសុវត្ថិភាពខ្ពស់ និងត្រូវអនុវត្តតាមច្បាប់បទដ្ឋានគតិយុត្តអគ្គិភ័យ ដែលមានចែងនៅក្នុងប្រទេសកម្ពុជា។

លោកឧត្តមសេនីយ៍ឯក នេត វន្ថា បញ្ជាក់ថា ការធ្វើសមយុទ្ធនៅ​ពេល​នេះ គឺដើម្បីឱ្យបុគ្គលិកនៅក្នុងអគារ ចេះអំពីវិធានការបង្ការ ​និងពន្លត់អគ្គិភ័យបឋម​ដោយ​ខ្លួនឯង និង​ចេះ​ជម្លៀស​ខ្លួនចេញពីកន្លែងកើតហេតុ ​ព្រមទាំងផ្សាភ្ជាប់ជាមួយជំនាញរបស់​សមត្ថកិច្ច​ជាដើម៕

អត្ថបទ៖ សំអឿន