រុស្ស៊ី ចោទ អាមេរិក និងណាតូ យក អ៊ុយក្រែន ជាកន្លែងដើម្បីសាកល្បងអាវុធថ្មីៗ

លោក Vyacheslav Volodin ប្រធានសភាជាន់ទាបរបស់រុស្ស៊ី ឬ State Duma កាលពីថ្ងៃអាទិត្យបានចោទប្រកាន់ប្រទេសលោកខាងលិចថា កំពុងប្រើប្រាស់អ៊ុយក្រែនជាកន្លែងហ្វឹកហាត់ដើម្បីសាកល្បងអាវុធរបស់ពួកគេ ។

លោក Volodin បាននិយាយនៅក្នុងសារ Telegram ថា “ថ្ងៃនេះ អ៊ុយក្រែន គឺជាកន្លែងហ្វឹកហាត់សម្រាប់ទីក្រុងវ៉ាស៊ីនតោន និងណាតូ ដើម្បីសាកល្បងអាវុធរបស់ពួកគេ និងសាកល្បងវិធីថ្មីនៃសង្រ្គាម” ។

លោក​បាន​បន្ថែម​ថា លោក​ខាង​លិច​មិន​គិត​ដល់​ជីវិត​របស់​ប្រជាជន​អ៊ុយក្រែន​ទេ ហើយ​ចាត់​ទុក​ពួក​គេ​​ជា​របស់​ប្រើហើយបោះ​ចោល​បាន ។

លោក Volodin បានអះអាងថា “ទាំងអស់នេះបង្ហាញពីការចូលរួមដោយផ្ទាល់របស់ទីក្រុងវ៉ាស៊ីនតោននៅក្នុងអរិភាពមួយនេះ ហើយប្រតិបត្តិការយោធាពិសេសរបស់រុស្ស៊ីបានក្លាយជាមធ្យោបាយនៃការរំដោះប្រជាជនអ៊ុយក្រែន និងទឹកដី Slavic ពីពួកអាណានិគមអាមេរិក” ។

ទន្ទឹមនោះ លោក Volodin ក៏បានចោទប្រកាន់រដ្ឋាភិបាលរបស់ប្រធានាធិបតីអាមេរិក និងអ៊ុយក្រែន លោក Volodymyr Zelensky ពីការដកហូតសិទ្ធិ និងសេរីភាពនយោបាយរបស់ពួកគេ បង្រ្កាបក្រុមប្រឆាំង និងប្រព័ន្ធផ្សព្វផ្សាយ និងធ្វើទុក្ខបុកម្នេញវិហារគ្រិស្តអូស្សូដក់ជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Anadolu

ចុចអាន ៖ រុស្ស៊ី បន្តបាញ់មីស៊ីលស្រោចលើ អ៊ុយក្រែន ខណៈក្រុងកៀវ កំពុងចាំរថក្រោះ