ក្មេងប្រុសមហាសំណាង ត្រូវសង្គ្រោះបានពីក្រោមគំនរបាក់បែក ក្រោយជាប់ ៤ថ្ងៃ

ក្រុមអ្នកជួយសង្គ្រោះ បានទាញមនុស្សនៅរស់៤នាក់ រួមទាំងក្មេងប្រុសអាយុ៦ឆ្នាំម្នាក់ផងដែរ ចេញពីគំនរបាក់បែកក្នុងប្រទេសស៊ីរីកាលពីថ្ងៃសុក្រទី១០ខែកុម្ភៈ ពោលគឺបួនថ្ងៃបន្ទាប់ពីការរញ្ជួយដីដ៏ខ្លាំងក្លា បានសម្លាប់មនុស្សជាង២៣០០០នាក់ នៅក្នុងប្រទេសស៊ីរី និងតួកគី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមអ្នកស្ម័គ្រចិត្ដនៅទីក្រុង Jandairis ភាគពាយព្យដែលកាន់កាប់ដោយក្រុមឧទ្ទាម បានទាញកុមារាឈ្មោះ Musa Hmeidi ពីក្រោមគំនរអគារបាក់បែក ខណៈអ្នកស្រុកមានការភ្ញាក់ផ្អើលនិងអបអរសាទរ។

ទន្ទឹមនោះ ទីភ្នាក់ងារព័ត៌មានរដ្ឋ SANA ផ្សាយថា នៅក្នុងទីក្រុង Jableh ដែលគ្រប់គ្រងដោយរដ្ឋាភិបាល ក្រុមសង្គ្រោះបន្ទាន់ក៏បានទាញមនុស្សបីនាក់ទាំងនៅរស់ ចេញពីគំនរបាក់បែកផងដែរ។

ការរកឃើញនេះគឺពិតជាភ្ញាក់ផ្អើលខ្លាំងមែនទែន ខណៈអ្នកជំនាញនិយាយថា ជាទូទៅ កម្រមានអ្នកអាចនៅរស់រានមានជីវិតបានណាស់ ក្រោយផុត៣ថ្ងៃនៃប្រតិបត្តិការសង្គ្រោះបន្ទាន់បន្ទាប់ពីគ្រោះមហន្តរាយដ៏ធំបែបនេះ។

គួរបញ្ជាក់ថា ការរញ្ជួយដីដ៏ធំនៅក្នុងប្រទេសតួកគី និងស៊ីរី គឺជាគ្រោះមហន្តរាយដ៏អាក្រក់បំផុតមួយក្នុងតំបន់នារយៈពេលមួយសតវត្សរ៍ចុងក្រោយនេះ៕

ប្រែសម្រួល៖ Vann Vann

ប្រភព៖ CNA

ចុចអាន៖ ទារិកាជីវិតថ្លៃកើតក្រោមគំនរបាក់បែក ត្រូវគេដាក់ឈ្មោះឲ្យ ខណៈមនុស្សរាប់ពាន់នាក់ សុំយកទៅចិញ្ចឹម