អតីតប្រធានសមាគមសិល្បករខ្មែរចេញមុខការពារ​សម្បត្តិវប្បធម៌របស់ជាតិខ្មែរ

ប៉ុន្មានថ្ងៃនៅលើទំព័រហ្វេសប៊ុករបស់អតីតប្រធានសមាគមសិល្បករខ្មែរ និងតារាចម្រៀងជើងចាស់ល្បីឈ្មោះលោក សុះ ម៉ាច បានធ្វើការសរសេរបង្ហោះនូវខ្លឹមសារជាបន្តបន្ទាប់ជុំវិញករណីដែលថៃបានជួលគ្រូរបាំ និងគ្រូឧបករណ៍ភ្លេងបុរាណ​(ទ្រ) ខ្មែរទៅបង្ហាត់នៅសាលាថៃដើម្បីឲ្យកូនខ្មែរប្រយ័ត្ន ។

ជាការកត់សម្គាល់បន្ទាប់ពីមានការបង្ហោះ គឺភ្លាមៗនោះដែរបានធ្វើឲ្យជនជាតិថៃមួយចំនួនបានបញ្ចេញប្រតិកម្មមកលើតារាចម្រៀងខ្មែរលោក សុះ ម៉ាច ផងដែរ។ ប៉ុន្តែជាការឆ្លើយតបលោក សុះ ម៉ាច បានបញ្ជាក់ប្រាប់ឲ្យដឹងថា នេះគ្រាន់តែលោកចេញមកដើម្បីការពារសម្បត្តិវប្បធម៌របស់ជាតិខ្មែរប៉ុណ្ណោះ។

លោក សុះ ម៉ាច បាននិយាយថា “សូមទោសផងដែលខ្ញុំធ្វើឲ្យអ្នក(ថៃ)មិនសប្បាយចិត្ត្កក៏ព្រោះតែខ្ញុំការពារសម្បត្តិវប្បធម៌របស់ជាតិខ្មែរ។ អ្នកអាចយករូបខ្ញុំមកកែរជាត្លុកបាន តែអ្នកមិនអាចយករូបប្រមុខថ្នាក់ដឹកនាំប្រទេសខ្ញុំដែលជាតិខ្មែរគោរពទៅលេងសើចបានឡើយ។ ចុះប្រសិនបើខ្ញុំយកអ្នកដឹកនាំប្រទេសរបស់អ្នកទៅលេងសើចប្រមាថវិញ តើក្នុងចិត្តអ្នកវិញគិតយ៉ាងម៉េចដែរ?។

អតីតប្រធានសមាគមសិល្បករខ្មែររូបនេះបន្តថា បើអ្នកជាជាតិសាសន៍ថ្លៃថ្នូរអ្នកនឹងយល់ពីអ្វីដែលខ្ញុំនិយាយ។ សង្ឃឹមថាអ្នកជាជាតិសាសន៍ល្អដែលហ៊ានទទួលស្គាល់ការពិត។ តែទោះជាយ៉ាងណាខ្ញុំនៅតែគោរពចំពោះជនជាតិថៃណាដែលជាមិត្តដ៏ល្អរបស់ខ្មែរជានិច្ច។

គួររម្លឹកថា ថ្មីៗកន្លងទៅនេះលោក សុះ ម៉ាច បានសរសេរបង្ហោះដូច្នេះថា ខ្ញុំបានឮល្ហិចល្ហៀងថា ថៃបានជួលអ្នកគ្រូរបាំបុរាណ អោយទៅបង្ហាត់នៅសាលាថៃព្រមទាំងទាក់ទងលោកគ្រូតុលា ដែលជាគ្រូបង្ហាត់ឧបករណ៍ភ្លេងបុរាណ(ទ្រ)ទៅបង្ហាត់នៅសាលាថៃ ដោយផ្តល់ជូនប្រាក់ខែខ្ពស់ទៀតផងតែលោកគ្រូតុលាមិនព្រមទទួលយកការអញ្ជើញនោះទេ។ តែអ្នកគ្រូរបាំដែលខ្ញុំមិនចាំឈ្មោះបាននឹងកំពុងតែបង្ហាត់នៅទីនោះផងដែរ (មិនដឹងថាពិតឬយ៉ាងណានោះទេ)។ នេះបើតាមការអោយដឹងពីលោកគ្រូតុលា និងប្រភពមួយទៀតដែលខ្ញុំមិនចាំ។

លោកបន្តថា ពាក់ព័ន្ធរបាំបុរាណ បើថៃគេរៀនបានប្រហាក់ប្រហែលនឹងខ្មែរមែននោះ បញ្ហានឹងកើតមានទៀតមិនខានដូចជា ល្ខោនខោល គុនខ្មែរជា ដើម។ ចូលប្រយ័ត្នផងណា៎។ នេះជាការបញ្ចេញមតិយោបល់ក្នុងនាមសិល្បករខ្មែរមួយរូបដែលស្រឡាញ់ និងអភិរក្សសិល្ប:វប្បធម៌ខ្មែដ៏ល្អផូរផង់៕

អត្ថបទ៖ ចាន់រ៉ា