កីឡា

សហព័ន្ធប្រដាល់គុនខ្មែរ៖ បើកវគ្គបណ្ដុះបណ្ដាលគ្រូបង្វឹករយៈពេល ៥ថ្ងៃដោយផ្តោលើពីរចំណុចសំខាន់ៗ

បានផុស

១១ ខែ មុន

នៅ

ថ្ងៃចន្ទ ២១ កក្កដា ២០២៥

ដោយ

សហព័ន្ធប្រដាល់គុនខ្មែរកាលពីព្រឹកថ្ងៃទី២១ ខែកក្ដដា ឆ្នាំ២០២៥ នេះបើកវគ្គបណ្ដុះបណ្ដាលគ្រូបង្វឹកប្រដាល់គុនខ្មែរស្ដីពី «បទបញ្ជាបច្ចេកទេសគ្រប់គ្រងការប្រកួត» សិក្ខាកាមនឹងយល់ដឹងពីរចំណុចធំៗការគ្រប់គ្រង់ក្លឹប និងការគ្រប់គ្រងការប្រកួតដើម្បីយកទៅអភិវឌ្ឍន៍ក្លឹបរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ម៉ិល កាដូ

លោក ម៉ិល កាដូ អនុប្រធានសហព័ន្ធបានឲ្យដឹងថា សហព័ន្ធនឹងព្យាយាមបង្កើតវគ្គបណ្ដុះបណ្ដាលផ្សេងៗឲ្យបានយ៉ាងហោច ៣ដងក្នុងមួយឆ្នាំដើម្បីពង្រឹងសមត្ថភាព ពង្រីកចំណេះដឹងដល់គ្រូបង្វឹកនៅតាមបណ្ដាក្លឹបនានាដើម្បីយកទៅអនុវត្តន៍ការងារប្រចាំថ្ងៃ។

ទិដ្ឋភាពបើកវគ្គបណ្ដុះបណ្ដាល

ដោយឡែកសម្រាប់វគ្គបណ្ដុះបណ្ដាលចាប់ពីថ្ងៃទី២១ ខែកក្ដដា ២០២៥ នេះជាវគ្គថ្មី និងមានសារសំខាន់មួយដល់ការពង្រីកចំណេះដឹងបន្ថែមទៀតដល់សិក្ខាកាមចូលរួម។ វគ្គបណ្ដុះបណ្ដាលនេះផ្ដោតលើពីរចំណុចធំៗទី១ បង្រៀនពីបច្ចេកទេសលើការគ្រប់គ្រងការប្រកួតនានា ទី២ បង្រៀននៃការគ្រប់គ្រងក្លឹបផ្ទាល់ និងការអភិវឌ្ឍន៍ក្លឹបឲ្យមានភាពរីកចម្រើនទៅបាន។

ទិដ្ឋភាពបើកវគ្គបណ្ដុះបណ្ដាល

ក្នុងនាមសហព័ន្ធមានចិត្តសប្បាយរីករាយជាខ្លាំងដែលសិក្ខាកាមមកចូលរួមវគ្គបណ្ដុះបណ្ដាលនេះលើសការកំណត់ទៅទៀតដែលនេះបង្ហាញពីការចង់ទទួលបាននូវចំណេះដឹងថ្មីៗក្នុងការអភិវឌ្ឍន៍ឲ្យកាន់តែមានភាពរីកចម្រើន។ លោកសំណូមពរដល់សិក្ខាកាមទាំងអស់ត្រូវយកចិត្តទុដាក់សិក្សារៀនសូត្រ និងមិនត្រូវអវត្តមានក្នុងពេលសិក្សានោះឡើយ ព្រោះពីមួយថ្ងៃទៅមួយថ្ងៃ ពីមួយចំណុចទៅមួយចំណុចសុទ្ធតែសំខាន់ និងទាក់ទងគ្នា។

ទិដ្ឋភាពបើកវគ្គបណ្ដុះបណ្ដាល

បញ្ជាក់ដែរថា សហព័ន្ធប្រដាល់គុនខ្មែរបានបើកវគ្គបណ្ដុះបណ្ដាលគ្រូបង្វឹកប្រដាល់គុនខ្មែរស្ដីពី «បទបញ្ចាបច្ចេកទេសគ្រប់គ្រងការប្រកួតកីឡាប្រដាល់គុនខ្មែរ» រយៈពេល ៥ថ្ងៃចាប់ពីថ្ងៃទី២១ ដល់ ២៥ ខែកក្ដដា ឆ្នាំ២០២៥ នៅពហុកីឡដ្ឋានជាតិ។ សិក្ខាកាមចូលរួមសរុប ៤៩នាក់មកពីបណ្ដាក្លឹបប្រដាល់តាមរាជធានី-ខេត្ត៕