អាមេរិក ជំរុញឲ្យប្រធានាធិបតីចិន ដាក់សម្ពាធលោក ពូទីន ជុំវិញ​ឧក្រិដ្ឋកម្ម​សង្រ្គាម​នៅ​អ៊ុយក្រែន

សហរដ្ឋអាមេរិក បានជំរុញឲ្យប្រធានាធិបតីចិន លោក ស៊ី ជីនពីង ដាក់សម្ពាធលើលោក វ្ល៉ាឌីមៀរ ពូទីនឲ្យបញ្ឈប់ឧក្រិដ្ឋកម្មសង្គ្រាម នៅអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំទាំងពីរ បានជួបគ្នាម្តងទៀតនៅថ្ងៃអង្គារទី២១ខែមីនា សម្រាប់កិច្ចពិភាក្សាផ្លូវការ ក្នុងអំឡុងពេលដំណើរទស្សនកិច្ចលើកដំបូងរបស់លោក ស៊ី ទៅកាន់ទីក្រុងមូស្គូ ចាប់តាំងពីរុស្ស៊ី បើកការវាយលុកអ៊ុយក្រែន។

អ្នកនាំពាក្យក្រុមប្រឹក្សាសន្តិសុខជាតិរបស់សេតវិមាន បានអំពាវនាវឲ្យលោក ស៊ី ត្រូវជំរុញសមភាគីរុស្ស៊ីឲ្យដកទ័ពចេញពីប្រទេសអ៊ុយក្រែន។

លោក John Kirby និយាយថា ការស្វែងរកបទឈប់បាញ់ នឹងមិនគ្រប់គ្រាន់ទេ។ លោកលើកឡើងថា “យើងសង្ឃឹមថា លោកប្រធានាធិបតី ស៊ី នឹងដាក់សម្ពាធលើលោកប្រធានាធិបតី ពូទីន ឲ្យបញ្ឈប់ការទម្លាក់គ្រាប់បែកលើទីក្រុង មន្ទីរពេទ្យ និងសាលារៀនអ៊ុយក្រែន, ឲ្យបញ្ឈប់ឧក្រិដ្ឋកម្មសង្រ្គាម និងអំពើឃោរឃៅ ហើយដកទ័ពរបស់គាត់ចេញ”។

ប៉ុន្តែលោកបង្ហាញក្តីព្រួយបារម្ភថា ចិននឹងអំពាវនាវជាថ្មីឲ្យមានបទឈប់បាញ់ ដែលនៅតែបន្សល់ទុកកងកម្លាំងរុស្ស៊ីនៅក្នុងទឹកដីអធិបតេយ្យរបស់អ៊ុយក្រែន ហើយបទឈប់បាញ់ណាមួយដែលមិនអាចដោះស្រាយការដកកងកម្លាំងរុស្ស៊ីចេញពីអ៊ុយក្រែនបាន នឹងផ្តល់សច្ចាប័នលើការសញ្ជ័យខុសច្បាប់របស់រុស្ស៊ីប្រកបដោយប្រសិទ្ធភាព។

ទោះបីជាយ៉ាងណាក៏ដោយ លោក ពូទីន និយាយថា លោកនឹងពិភាក្សាអំពីផែនការ ១២ចំណុចដែលស្នើឡើងដោយលោក ស៊ី ដើម្បីដោះស្រាយវិបត្តិធ្ងន់ធ្ងរនៅអ៊ុយក្រែន។

គួរបញ្ជាក់ថា ប្រទេសចិនបានបញ្ចេញផែនការរបស់ខ្លួនដើម្បីបញ្ចប់សង្រ្គាមកាលពីខែមុន ដែលក្នុងនោះរួមបញ្ចូលទាំង ការបញ្ឈប់អរិភាពនិងការចាប់ផ្តើមកិច្ចចរចាសន្តិភាពឡើងវិញផងដែរ៕

ប្រែសម្រួល៖ Vann Vann

ប្រភព៖ BBC

ចុចអាន៖ មកដឹងម្ហូបពិសេសៗ នៃអាហារពេលល្ងាច ដែលលោក ពូទីន និងលោក ស៊ី ទទួលទានជាមួយគ្នា