ក្រសួងការពារជាតិថា យន្តហោះចម្បាំងចិន ១០គ្រឿង បានឆ្លងចូលច្រកសមុទ្រតៃវ៉ាន់

ក្រសួងការពារជាតិតៃវ៉ាន់បានថ្លែងកាលពីថ្ងៃសៅរ៍ ទី១ ខែមេសា ថា យន្តហោះចិនចំនួន ១០គ្រឿងបានឆ្លងកាត់ខ្សែបន្ទាត់នៃច្រកសមុទ្រតៃវ៉ាន់ ដែលខ្សែបន្ទាត់នេះជារបាំងរវាងភាគីទាំងពីរ។

ក្រសួងបាននិយាយនៅក្នុងរបាយការណ៍ប្រចាំថ្ងៃរបស់ខ្លួនស្តីពីសកម្មភាពយោធារបស់ចិនក្នុងរយៈពេល ២៤ម៉ោង នៅម៉ោង ៦ ព្រឹក ម៉ោងក្នុងស្រុក កាលពីម្សិលមិញថា យន្តហោះចម្បាំងចិនចំនួន ៩គ្រឿង និងយន្តហោះយោធាគ្មានមនុស្សបើក ១គ្រឿងបានឆ្លងកាត់ខ្សែបន្ទាត់មិនផ្លូវការរវាងព្រំខណ្ឌនៃដែនសមុទ្ររបស់ចិន និងកោះតៃវ៉ាន់។

ជាមួយគ្នានោះ តៃវ៉ាន់បានបញ្ជូនយន្តហោះទៅព្រមានយន្តហោះចិន និងប្រព័ន្ធកាំជ្រួចត្រួតពិនិត្យលើយន្តហោះចម្បាំងទាំងនោះ ដែលនេះជាស្តង់ដារសម្រាប់ការឆ្លើយតបរបស់ខ្លួនទៅលើសកម្មភាពរបស់ចិន។

ដោយឡែក យន្តហោះចិនចំនួន ៩គ្រឿង ដែលបានឆ្លងកាត់ខ្សែបន្ទាត់សមុទ្រតៃវ៉់ាន់ កាលពីថ្ងៃសុក្រកន្លងទៅ ត្រូវបានទីក្រុងប៉េកាំងអះអាងថាខ្លួនកំពុងអនុវត្តការល្បាតត្រៀមប្រយុទ្ធ ខណៈក្រសួងការពារជាតិតៃវ៉ាន់ចាត់ទុកវាជាទង្វើដែលបានបង្កើតភាពតានតឹងដោយចេតនា និងថា វាកំពុងធ្វើឱ្យខូចដល់សន្តិភាព និងស្ថិរភាពរបស់កោះតៃវ៉ាន់៕

ប្រែសម្រួល៖ សន្យា

ប្រភព៖ Reuters

ចុចអាន៖ ក្រុងសេអ៊ូល ៖ កូរ៉េខាងជើង ប្រហារជីវិតមនុស្ស ដោយសារមើលវីដេអូរបស់ កូរ៉េខាងត្បូង

ចុចអាន៖ ២ ខែទៀតទើប អ៊ុយក្រែន អាចប្រើរថក្រោះខ្លារខិន Leopard លើសមរភូមិ​ប្រយុទ្ធបាន