ទីក្រុងព្យុងយ៉ាង ព្រមានថា សមយុទ្ធអាមេរិក-កូរ៉េខាងត្បូង ធ្វើឲ្យស្ថានការណ៍កាន់តែតានតឹង ឈានទៅរកសង្គ្រាមនុយក្លេអ៊ែរ (មានវីដេអូ)

ប្រទេសកូរ៉េខាងជើងនៅថ្ងៃព្រហស្បតិ៍ទី០៦ខែមេសា បានចោទប្រកាន់សហរដ្ឋអាមេរិក និងកូរ៉េខាងត្បូង ថា បង្កឲ្យមានភាពតានតឹងឈានទៅរកសង្គ្រាមនុយក្លេអ៊ែរ តាមរយៈសមយុទ្ធយោធារួមគ្នា។ ទន្ទឹមនោះ ទីក្រុងព្យុងយ៉ាង ក៏បានប្តេជ្ញាឆ្លើយតបជាមួយសកម្មភាពខ្លាំងក្លាផងដែរ។

ប្រព័ន្ធផ្សព្វផ្សាយរដ្ឋ KCNA បានដកស្រង់ការអត្ថាធិប្បាយរបស់អ្នកវិភាគសន្តិសុខអន្តរជាតិលោក Choe Ju Hyon ដែលបានរិះគន់សមយុទ្ធនេះថាជា “ការជំរុញឲ្យស្ថានការណ៍នៅឧបទ្វីបកូរ៉េ ឈានដល់ចំណុចផ្ទុះ”។

អត្ថបទនេះនិយាយថា “ភាពឡប់សតិនៃការប្រឈមមុខដាក់គ្នាខាងយោធាដែលមិនប្រុងប្រយ័ត្នរបស់សហរដ្ឋអាមេរិក និងអ្នកដើរតាមគន្លងរបស់ខ្លួនប្រឆាំងកូរ៉េខាងជើង កំពុងជំរុញឲ្យស្ថានការណ៍នៅលើឧបទ្វីបកូរ៉េ ឆ្ពោះទៅរកមហន្តរាយដែលមិនអាចវិលត្រលប់វិញបាន ហើយឈានដល់គែមនៃសង្គ្រាមនុយក្លេអ៊ែរ”។

គួរបញ្ជាក់ថា កងកម្លាំងអាមេរិក និងកូរ៉េខាងត្បូង បាននិងកំពុងធ្វើសមយុទ្ធនិទាឃរដូវប្រចាំឆ្នាំជាបន្តបន្ទាប់ ចាប់តាំងពីខែមីនាមក រួមទាំងសមយុទ្ធផ្លូវអាកាស និងសមុទ្រ ដែលពាក់ព័ន្ធនឹងនាវាផ្ទុកយន្តហោះអាមេរិក និងយន្តហោះទម្លាក់គ្រាប់បែក B-1B និង B-52 ព្រមទាំងសមយុទ្ធចូលសំចតខ្នាតធំជាលើកដំបូងក្នុងរយៈពេល៥ឆ្នាំផងដែរ។

កូរ៉េ​ខាង​ជើង ​បាន​បញ្ចេញ​ប្រតិកម្ម​យ៉ាង​ខឹងសម្បា​ចំពោះ​សមយុទ្ធទាំង​នេះ ដោយ​ហៅ​​ថា ​ជា​ការ​ហាត់សម​ដើម្បី​​វាយលុក។

លើសពីនេះ កូរ៉េខាងជើង បាននិងកំពុងបង្កើនសកម្មភាពយោធារបស់ខ្លួនក្នុងប៉ុន្មានសប្តាហ៍ចុងក្រោយ ដោយបង្ហាញក្បាលគ្រាប់នុយក្លេអ៊ែរស៊េរីថ្មី និងតូចជាងមុន, បាញ់មីស៊ីលអន្តរទ្វីបដែលមានសមត្ថភាពវាយប្រហារគ្រប់ទីកន្លែងក្នុងសហរដ្ឋអាមេរិក និងសាកល្បងអ្វីដែលគេហៅថា យានគ្មានមនុស្សបើកវាយប្រហារក្រោមទឹកដែលមានសមត្ថភាពនុយក្លេអ៊ែរ៕

សូមទស្សនាវីដេអូ៖

ប្រែសម្រួល៖ Vann Vann

ប្រភព៖ CNA

ចុចអាន៖ កូរ៉េខាងជើង ទៅរក UN ឲ្យជួយបញ្ឈប់សមយុទ្ធយោធា អាមេរិក-កូរ៉េខាងត្បូង ជាបន្ទាន់