ជុំ លីណូ សុំចិត្តមហាជនរក្សាសណ្តាប់ធ្នាប់ និងកិត្តិយសប្រទេសជាតិពេល ប៊ូខាវ មកកម្ពុជា

ភ្នំពេញ ៖ ស្របពលដែលកម្ពុជាកំពុងធ្វើជាម្ចាស់ផ្ទះកីឡាស៊ីហ្គេមលើកទី៣២ និងអាស៊ីប៉ារ៉ាហ្គេមលើកទី១២ ដែលទទួលបានការអបអរសាទរយ៉ាងខ្លាំងពីសំណាក់មហាជនទូទៅនេះ តារាចម្រៀងលោក ជុំ លីណូ បានចេញមកអំពាវនាវទទូចសុំចិត្តមហាជនរក្សាសណ្តាប់ធ្នាប់និងកិត្តិយសប្រទេសជាតិឲ្យថ្លៃថ្នូរពេល ប៊ូខាវ មកដល់កម្ពុជា។

លោក ជុំ លីណូ បានលើកឡើងថា ប៊ូខាវ មកដល់ខ្មែរសូមចិត្តបងប្អូន ទទួលស្វាគមន៍ឲ្យបានល្អកុំ ឌឺដងកុំស្អប់កុំរើសអើងត្រូវរក្សាសណ្តាប់ធ្នាប់និងកិត្តិយសប្រទេសជាតិយើង ឲ្យថ្លៃថ្នូរសូមអរគុណ។ ការបង្ហាញចេតនាដ៏ល្អក្នុងនាមជាប្រជាពលរដ្ឋខ្មែរ ដែលជាម្ចាស់ផ្ទះនៃព្រឹត្តិការណ៍ប្រវត្តិសាស្ត្រនៃ ការបើកកីឡាស៊ីហ្គេមលើកទី៣២ និង អាស៊ីប៉ារ៉ាហ្គេមលើកទី ១២ពីសំណាក់តារាចម្រៀងលោក ជុំ លីណូ គឺទទួលបានការគាំទ្រច្រើនពីមហាជន។

ជាមួយគ្នានឹងការលើកឡើងនេះដែរ លោក ជុំ លីណូ ក៏បានថ្លែងប្រាប់”កម្ពុជាថ្មី”ថា លោកក៏សូមសរសើរ និងលើកទឹកចិត្តចំពោះកីឡាករជម្រើសជាតិរបស់កម្ពុជា ក្នុងការប្រកួតកីឡាស៊ីហ្គេមទាំងអស់ដែលបានខិនខំដើម្បីជាតិ។

លោក ជុំ លីណូ គឺជាតារាចម្រៀងប្រុសមួយរូបដែលចូលចិត្តស្តាយ៍បែបយុវវ័យ។ សម្រាប់អាជីពសិល្ប:របស់លោក បច្ចុប្បន្ននៅតែរក្សាបានការគាំទ្រ និងមានប្រជាប្រិយភាពដូចដើម។ ទន្ទឹមនឹងនេះ លោកក៏មានអាជីវកម្មផ្ទាល់ ខ្លួនផងដែរ៕ អត្ថបទ៖ ចាន់រ៉ា