មីស៊ីលរុស្ស៊ីប្រភេទថ្មី អាចបំពាក់ក្បាលគ្រាប់នុយក្លេអ៊ែរចំនួន១០ នឹងបញ្ចេញទៅប្រយុទ្ធឆាប់ៗ

កាលពីថ្ងៃពុធទី២១ខែមិថុនា លោក វ្ល៉ាឌីមៀរ ពូទីន បានព្រមានថា មីស៊ីល Satan II ប្រភេទថ្មីដែលមានសមត្ថភាពផ្ទុកក្បាលគ្រាប់នុយក្លេអ៊ែរចំនួន១០ នឹងត្រូវដាក់ពង្រាយសម្រាប់ការប្រយុទ្ធក្នុងពេលដ៏ខ្លីខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេដឹកនាំរុស្ស៊ី បានគំរាមប្រទេសលោកខាងលិចជាមួយមីស៊ីលនុយក្លេអ៊ែរទម្ងន់២០៨តោននេះ ខណៈលោកថ្លែងទៅកាន់និស្សិតបញ្ចប់ការសិក្សាផ្នែកយោធានៅក្នុងវិមាន ក្រឹមឡាំង។

មីស៊ីលយក្សនេះ ​ត្រូវបានរុស្ស៊ីអះអាងថា មានល្បឿន ២៥,៥៥៦ គីឡូម៉ែត្រក្នុងមួយម៉ោង ហើយអាចហោះ​ទៅដល់​ចក្រភព​អង់គ្លេស​ក្នុង​រយៈពេល​ត្រឹមតែ​ ៣ ​នាទី​ប៉ុណ្ណោះ ។

វាក៏ជាមីស៊ីល​អន្តរទ្វីប ដែលគេនិយាយថា មាន​រយៈ​ចម្ងាយ​ឆ្ងាយ​បំផុត​របស់​ពិភពលោក​ដែល​មាន​សមត្ថភាព​បាញ់​ដល់​គោលដៅ​ចម្ងាយ ១៨,០២៤ គីឡូម៉ែត្រផងដែរ ។ បើ​បំពាក់​ក្បាល​គ្រាប់​នុយក្លេអ៊ែរចំនួន​១០ ​ឬ​ច្រើន​ជាងនេះ វា​សមល្មមដើម្បី​កម្ទេច​ទឹកដី ​ដែល​មាន​ទំហំប៉ុនប្រទេស​អង់គ្លេស ឬ​បារាំងបាន។

លើសពីនេះ លោក ពូទីន ក៏អះអាងដែរថា ប្រតិបត្តិការយោធាពិសេសរបស់លោក ដើម្បីវាយលុកអ៊ុយក្រែន បានផ្តល់បទពិសោធន៍ដែលមិនអាចកាត់ថ្លៃបាន ដល់កងកម្លាំងរុស្ស៊ី។

គួរបញ្ជាក់ថា ការអះអាងរបស់លោក ពូទីន កើតឡើងប៉ុន្មានថ្ងៃ បន្ទាប់ពីប្រធានាធិបតីអាមេរិកលោក ចូ បៃដិន ព្រមានថា រុស្ស៊ីអាចនឹងប្រើប្រាស់អាវុធនុយក្លេអ៊ែរយុទ្ធសាស្ត្រ ពិតប្រាកដមែន។

ថ្លែងទៅកាន់ក្រុមអ្នកផ្តល់ជំនួយក្នុងរដ្ឋកាលីហ្វ័រញ៉ា កាលពីថ្ងៃចន្ទទី១៩ខែមិថុនា លោក បៃដិន គូសបញ្ជាក់ថា ការចល័តនុយក្លេអ៊ែររបស់រុស្ស៊ីនៅបេឡារុស អាចជាសញ្ញាមួយដែលថា ទីក្រុង មូស្គូ កំពុងរៀបចំប្រើប្រាស់នុយក្លេអ៊ែរមែន៕

ប្រែសម្រួល៖ Vann Vann

ប្រភព៖ Daily Mail

ចុចអាន៖ លោក បៃដិន ព្រមានថា រុស្ស៊ី អាចបាញ់នុយក្លេអ៊ែរ មែន