NBC៖ វិស័យធនាគារនឹងបន្តដើរតួនាទីសំខាន់​ក្នុងការគាំទ្រកំណើនសេដ្ឋកិច្ច នៅឆមាសទី២

នៅក្នុងឆមាសទី២ វិស័យធនាគារ នឹងបន្តដើរតួនាទីយ៉ាងសំខាន់ក្នុងការចូលរួមគាំទ្រកំណើន សេដ្ឋកិច្ចជាតិ តាមរយៈ​ការផ្តល់ហិរញ្ញប្បទាន និងសេវាហិរញ្ញវត្ថុនានា ដោយឥណទានត្រូវបានរំពឹងថា នឹងមានកំណើនក្នុងអត្រា ១៥% គួបផ្សំនឹងការបន្តអនុវត្តវិធានការគាំទ្រដទៃទៀត។ នេះបើតាមរបាយការណ៍ប្រចាំឆមាសទី១ និងទិសដៅឆមាសទី២ ឆ្នាំ ២០២៣ របស់ធនាគារជាតិកម្ពុជា(NBC)។

បើតាមធនាគារជាតិ ប្រព័ន្ធទូទាត់អេឡិចត្រូនិកនឹងបន្តរួមចំណែកសម្រួលដល់សកម្មភាពពាណិជ្ជកម្ម និងការវិនិយោគ ក្នុងស្រុក និងតំបន់ សំដៅគាំទ្រដល់កំណើនសេដ្ឋកិច្ចកម្ពុជានៅក្រោយវិបត្តិ ស្របតាមចក្ខុវិស័យរបស់រាជរដ្ឋាភិបាល​ក្នុងការកសាងសេដ្ឋកិច្ចឌីជីថលដ៏រឹងមាំមួយ។

យោងតាមរបាយការណ៍បញ្ជាក់ថា នៅក្នុងឆមាសទី១ ទ្រព្យសកម្មរបស់គ្រឹះស្ថានធនាគារ កើនឡើង ៨,៩% ដល់ ២៨៣,៥ ទ្រីលានរៀល (៦៩,៩ ប៊ីលានដុល្លារអាមេរិក) ក្នុងនោះឥណទាន អតិថិជនកើនឡើង ១១,៩% ដល់ ១៨៨,៣ ទ្រីលាន រៀល (៤៥,៨ ប៊ីលានដុល្លារអាមេរិក) និងមានចំនួន ១,៦ លានគណនី។ ឥណទានត្រូវបានផ្ដល់ ទៅកាន់វិស័យ​សំខាន់ៗក្នុងសេដ្ឋកិច្ច ដូចជា៖ ការជួញដូររាយ ១៦% (មានកំណើន ១២,៩%) ការទិញផ្ទះជា​កម្មសិទ្ធិផ្ទាល់ខ្លួន ១៤,៥% (១៧,៥%) ការជួញដូរអចលនទ្រព្យ ៩,៥% (១៣,៦%) ការ ជួញដូរដុំ ៩,៣% (១១,៧%) សំណង់ ៩% (៨,៩%) កសិកម្ម រុក្ខាប្រមាញ់ និងនេសាទ ៨% (១៣,៤%) ការឱ្យខ្ចីជាបុគ្គល ៨,៣% (០,៩%) កម្មន្តសាល ៤,៣% (២២,២%) សណ្ឋាគារ និងភោជនីយដ្ឋាន ៤,២% (៧,៨%) និងផ្សេងៗ ១៦,៩% (១០,៤%)។ ដោយឡែក ប្រាក់បញ្ញើ បានកើនឡើង ៦,៤% ដល់ ១៥៩,៩ ទីលានរៀល (៣៩,៤ ប៊ីលានដុល្លារអាមេរិក) និងមានចំនួន ១៣,៧ លានគណនី។

សូមបញ្ជាក់ថា ប្រព័ន្ធធនាគារនៅកម្ពុជាមានដូចជា ធនាគារពាណិជ្ជ ៥៩ ធនាគារឯកទេស ៩ គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ ៥ គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨២ គ្រឹះស្ថានឥណទានជនបទ ១១៨ គ្រឹះស្ថាន​ភតិសន្យាហិរញ្ញវត្ថុ ១៧ អ្នកដំណើរការតតិយភាគី ៦ គ្រឹះស្ថានផ្តល់សេវាទូទាត់សងប្រាក់ ៣៥ អ្នកផ្តល់សេវា​ប្រព័ន្ធចែក​រំលែកព័ត៌មានឥណទាន ១ ការិយាល័យតំណាងធនាគារបរទេស ៦ និង អាជីវកម្មប្តូរប្រាក់ ២.៨៩០។ NBC គូសបញ្ជាក់ថា ទ្រព្យសកម្មរបស់ប្រព័ន្ធធនាគារ មានកំណើន ៩,៩% ដល់ ៣៣៣,៤ ទ្រីលានរៀល (៨២,២ ប៊ីលានដុល្លារអាមេរិក) ក្នុងនោះ វិស័យធនាគារគ្របដណ្ដប់ប្រមាណ ៨៥% ន ទ្រព្យសកម្មសរុប ស្របពេល ដែលវិស័យមីក្រូហិរញ្ញវត្ថុ និងវិស័យភតិសន្យាហិរញ្ញវត្ថុមានចំណែក ១៤,៤% និង ០,៦% រៀងគ្នា៕