លីវ ជីលី ចេញមកប្រតិកម្មអ្នកដែលចោទនាងនាំភ្លើង

បវរកញ្ញា លីវ ជីលី បាន​បង្ហាញ​ការ​មិន​សប្បាយ​ចិត្ត​ដោយ​ចេញ​មក​ប្រតិកម្ម​ឆ្លើយតប​ភ្លាមៗ បន្ទាប់ពី​មាន​មតិ​ចោទ​ប្រកាន់​ថា នាង​ជា​អ្នក​នាំ​ភ្លើង។ ជីលី ក៏បាន​បញ្ជាក់​ទៅ​វិញ​ថា «ចង់​ឲ្យ​បងប្អូន​ពន្យល់​ពាក្យ​នាំ​ភ្លើង​មាន​ន័យ​ម៉េច?»។

ប្រតិកម្ម​របស់​ស្រី​ស្អាត លីវ ជីលី ធ្វើ​ឡើង​កាលពី​យប់​ថ្ងៃ​ទី ២០ ខែ​សីហា ឆ្នាំ ២០២៣ ខណៈ​មុន​នោះ​នាង​បាន​បញ្ចេញមតិ​ខ្លះៗ ដោយ​សម្ដែង​ការ​សោកស្ដាយ​បវរកញ្ញា អ៊ិន លក្ខិណា ដែល​មិន​ឈ្នះ​មកុដ និង​អបអរ​កញ្ញា ភឹម ស្រីនោ ក្នុង​ការ​គ្រង​មកុដ Miss Grand Cambodia 2023 នេះ។ ជាមួយ​នោះ ក៏​ស្រាប់តែ​មាន​បុគ្គល​មួយ​ចំនួន​បាន​ចោទ​ថា នាង​ជា​អ្នក​នាំ​ភ្លើង។

កញ្ញា លីវ ជីលី បាន​បញ្ជាក់​ថា «ហេតុអ្វី​បាន​ជា​អ្នក​ដែល​ស្អប់​ខ្ញុំ​មក​ចោទ​ថា​ខ្ញុំ​នាំ​ភ្លើង? អ្នក​ដែល​ស្អប់​ខ្ញុំ​ត្រូវ​ចូល​មក​បកស្រាយ​ឲ្យ​ខ្ញុំ​នូវ​ពាក្យ​ដែរ​ថា នាំ​ភ្លើង តើ​ពាក្យ​នេះ​មានន័យថា​ម៉េច​? តើ​អ្នក​ស្អី​គេ ខ្ញុំ​ជា​ប្រជាជន ខ្ញុំ​ក៏​មាន​សិទ្ធិ​ដែរ ឬ បវរកញ្ញា​អត់​មាន​ចិត្ត អត់​មាន​បេះដូង​មែន? ឬ ចាំ​ឲ្យ​តែ​អ្នកឯង​ជេរ អ្នក​ឯង​ជាន់​មែន​?»។ នាង​បន្ត​ថា «ខ្ញុំ ខំ​ចំណាយ​លុយ​អស់​រាប់​ម៉ឺន​ចេញ​ទៅ​ប្រកួត​លើ​ឆាក​អន្តរជាតិ ដើម្បី​អ្វី​គេ​…..?»។

កញ្ញា លីវ ជីលី បាន​និយាយ​ទៀត​ថា «ប្រហែល​ពួកគាត់​ចង់​ឲ្យ​ខ្ញុំ​បិទមាត់​ទាំង​ដែល​ខ្ញុំ​មាន​សិទ្ធ​ជា​ប្រជាពលរដ្ឋ​មួយ​រូប ដែល​អបអរ​ក៏​ខុស សោកស្ដាយ​ក៏​ខុស លើក​មុន​ហូបបាយ​ក៏​ខុស តិច​ទៀត​ចូល​បន្ទប់ទឹក​ក៏​ខុស អ៊ីចឹង​បាន​ថា យើង​ម្នាក់​ផ្គាប់ចិត្ត​គេ ១ ប្រទេស មិនបាន​ទេ មាន​អ្នក​ស្អប់ មាន​អ្នក​ស្រលាញ់ ជា​រឿង​ធម្មតា ខ្ញុំ​មាន​សិទ្ធិ​បញ្ចេញមតិ បងប្អូន​ទាំងអស់​គ្នា​ក៏​មាន​សិទ្ធ បើ​ខ្ញុំ​ទៅ​លួច​ឆក់​ប្លន់​អា​ហ្នឹង​វា​ខុស ហួសចិត្ត​ដល់​ពេកៗ អ៊ីចឹង​ទៅ»។

លីវ ជីលី បន្ថែម​ថា «សូម​បងប្អូន​រៀន​បើក​ចិត្ត​ខ្លះ ខ្ញុំ​មិនទាន់​ទៅ​ដៀល​ទៅ​ជេរ​ប្រជាជន​យើង​ម្នាក់​ណា​ទេ ជា​ចុងក្រោយ ខ្ញុំ ស្រលាញ់​ប្រជាជន​កម្ពុជា»។

ដោយឡែក​អ្នកគាំទ្រ​នាង ក៏បាន​លើក​ឡើង​ថា «សួរ​បន្តិច Chily Tevy ជីលី ទេវី តើ​គាត់​ខុស​អ្វី​? បាន​នាំ​គ្នា​ជេរ​គាត់ ជាន់​គាត់ តាំងតែ ២០២០ មកដល់ពេលនេះ។ គាត់​ជា Miss Grand Cambodia 2020 ដែល​ត្រឹម​ជា​អ្នក​រង​ឈើ​បាក់​ពី​គេ ត្រូវ​គេ​ជេរ bully ពី​រូបរាង សមត្ថភាព សម្រស់ តែ​គាត់​នៅតែ​ស៊ូ ក៏​ព្រោះ​តែ​ពាក្យ​ថា កម្ពុជា»៕

អត្ថបទ ៖ ចាន់រ៉ា