FIFA ពិន័យលោក Rubiales ផ្អាកការងារ៩០ថ្ងៃដំបូងរឿងថើបមាត់កីឡាការិនី Jennifer

សហព័ន្ធបាល់ទាត់អេស្ប៉ាញ (RFEF) បានចេញផ្សាយរូបថតដែលអះអាងថា កីឡាការិនី Jennifer Hermoso ​បាន​កុហក​ ជុំវិញឧបទ្ទវហេតុ​ថើប​មាត់ដ៏ចម្រូងចម្រាសជាមួយប្រធានរបស់ខ្លួន គឺលោក Luis Rubiales ដែលថ្ងៃនេះត្រូវបាន FIFA ព្យួរការងារ។

ស្ថាប័នគ្រប់គ្រងបាល់ទាត់ពិភពលោក (FIFA) បានផ្អាកការងារ​លោក​ Rubiales រយៈពេល៩០ថ្ងៃដំបូង “ពីសកម្មភាពទាក់ទងនឹង​កីឡា​បាល់ទាត់ទាំងអស់ក្នុងកម្រិតជាតិ និងអន្តរជាតិ” និង​បានចេញបទបញ្ជា​ហាម​លោកទាក់ទង​ជា​មួយ​កីឡាការិនី​ Hermoso ក្នុង​ “បរិយាកាសជិតស្និទ្ធ”​។

សហព័ន្ធ​កីឡា​បាល់ទាត់​អេស្ប៉ាញបានបញ្ជាក់នៅក្នុងសេចក្តីថ្លែងការណ៍មួយថា ខ្លួនបានទទួលការជូនដំណឹងអំពីការផ្អាកបណ្តោះអាសន្ន និង​បាននិយាយថា អនុប្រធាន លោក Pedro Rocha នឹងកាន់តំណែងជាប្រធានបណ្តោះអាសន្ន។

បន្ទាប់ពី FIFA បាន​ដាក់​ពិន័យ​ដោយ​ព្យួរការងារ​លោក Rubiales បុគ្គលិកក្រុម​គ្រូបង្វឹក​របស់​ក្រុម​បាល់ទាត់​​នារី​អេស្ប៉ាញ ១១នាក់បានដាក់ឈ្មោះរបស់ពួកគេនៅក្នុងសេចក្តីថ្លែងការណ៍មួយដោយនិយាយថា ពួកគេបានលាលែងពីតំណែង។ សមាជិកទាំងនោះ “សម្តែងការថ្កោលទោសយ៉ាងម៉ឺងម៉ាត់ និងខ្លាំង​បំផុត​ចំពោះទង្វើដែលបង្ហាញដោយប្រធាន RFEF”។

ជាការឆ្លើយតប RFEF បានចេញ​រូបថតចំនួន ៤សន្លឹក ដែល​​បាន​បង្ហាញថា កីឡាការិនី​ Hermoso បានដាក់កម្លាំងលើលោក​ Rubiales ក្នុងអំឡុងពេលទំនាក់ទំនងរបស់ពួកគេ។

លេខាធិការកីឡាអេស្បាញលោក Victor Francos បានអះអាងថា រដ្ឋាភិបាលនឹងស្នើឱ្យ Rubiales ពន្យល់ពីសកម្មភាពរបស់លោកនៅក្នុងតុលាការអេស្ប៉ាញឱ្យបានឆាប់តាមដែលអាចធ្វើទៅបាន។

គណៈកម្មការ​វិន័យរបស់ FIFA បានបើកការស៊ើបអង្កេតលើ​ ករណី​នេះនៅកីឡដ្ឋាន Stadium Australia កាលពីថ្ងៃព្រហស្បតិ៍ (២៤ ខែ​សីហា) ដែលបានគ្របដណ្ដប់លើក្រុម​បាល់ទាត់​នារីអេស្ប៉ាញ​ឈ្នះ​ជើង​ឯកពិភព​លោក​ជាលើកដំបូង៕

ប្រែសម្រួល៖ មន្នីរ័ត្ន
ប្រភព៖ mirror.co.uk