កូរ៉េខាងជើង សម្ពោធ នាវាមុជទឹកវាយប្រហារនុយក្លេអ៊ែរ ទី១ របស់ខ្លួន

ទីភ្នាក់ងារសារព័ត៌មានរដ្ឋ KCNA បានប្រកាសនៅថ្ងៃសុក្រទី៨ខែកញ្ញាថា ប្រទេសកូរ៉េខាងជើងបានសម្ពោធ នាវាមុជទឹកវាយប្រហារនុយក្លេអ៊ែរយុទ្ធសាស្ត្រដំបូងរបស់ខ្លួន ដែលជាផ្នែកមួយនៃកិច្ចខិតខំប្រឹងប្រែងពង្រឹងកម្លាំងទ័ពជើងទឹក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាម KCNA បានឲ្យដឹងថា មេដឹកនាំកូរ៉េខាងជើងលោក គីម ជុងអ៊ុន ក៏បានចូលរួមក្នុងពិធីសម្ពោធនេះដែរ ហើយក្នុងអំឡុងពេលនោះ លោកបានសង្កត់ធ្ងន់អំពីផែនការយុទ្ធសាស្ត្រ ដើម្បីបន្តពង្រឹងភាពទំនើបនៃកងកម្លាំងលើផ្ទៃទឹក និងក្រោមទឹក ហើយលោកក៏បានជំរុញឲ្យមានការធ្វើទំនើបកម្មអាវុធនុយក្លេអ៊ែររបស់កងទ័ពជើងទឹកនាពេលអនាគតផងដែរ ។

នាវាមុជទឹកលេខ៨៤១ ត្រូវបានដាក់ឈ្មោះថា Hero Kim Kun Ok ជាឈ្មោះបុគ្គលប្រវត្តិសាស្ត្រកូរ៉េខាងជើងម្នាក់។ នាវាមុជទឹកនេះ នឹងត្រូវបានចាត់តាំងឲ្យទៅកងនាវាល្បាតដែនទឹកចន្លោះឧបទ្វីបកូរ៉េ និងប្រទេសជប៉ុន។

ទោះបីជាយ៉ាងណាក៏ដោយ ភ្លាមៗនោះ គេមិនទាន់ដឹងច្បាស់ទេថាតើ មីស៊ីលប្រភេទណា ដែលនាវាមុជទឹកថ្មីនេះ នឹងបំពាក់មកជាមួយនោះទេ។

សូមបញ្ជាក់ថា កូរ៉េខាងជើង មានកងនាវាមុជទឹកដ៏ធំ ប៉ុន្តែមានតែនាវាមុជទឹក 8.24 Yongung ប៉ុណ្ណោះដែលអាចបាញ់មីស៊ីលបាន៕

ប្រែសម្រួល៖ Vann Vann

ប្រភព៖ DW

ចុចអាន៖ វត្តមាននាវាមុជទឹកអាមេរិក នៅឧបទ្វីបកូរ៉េ ធ្វើឲ្យសង្គ្រាមនុយក្លេអ៊ែរ ជិតកើតឡើងមែនទែនហើយ