សេចក្ដីព្រាងច្បាប់ស្ដីពីការបង្កើតក្រសួងអធិការកិច្ច និងរដ្ឋលេខាធិការដ្ឋានកិច្ចការព្រំដែន នឹងត្រូវរដ្ឋសភាលើកមកប្រជុំពិភាក្សាអនុម័ត ចុងសប្ដាហ៍នេះ

សម្តេច​មហារដ្ឋ​សភា​ធិ​ការ​ធិបតី ឃួន សុ​ដា​រី ប្រធានរដ្ឋសភា នៃ​ព្រះរាជាណាចក្រ​កម្ពុជា កាលពី​ព្រឹក​ថ្ងៃ​ចន្ទ ទី ១១ ខែកញ្ញា ឆ្នាំ ២០២៣ នេះ បាន​ដឹកនាំ​កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា នៅ​វិមាន​រដ្ឋសភា ដើម្បី​អនុម័ត​បញ្ចូល​សេចក្ដីព្រាងច្បាប់​ស្ដីពី ការបង្កើត​ក្រសួង​អធិការកិច្ច និង​សេចក្ដីព្រាងច្បាប់​ស្តីពី ការបង្កើត​រដ្ឋលេខាធិការដ្ឋាន​កិច្ចការ​ព្រំដែន ក្នុង​របៀបវារៈ​បន្ត​សម័យ​ប្រជុំ​រដ្ឋសភា​លើក​ទី ១ នីតិកាល​ទី ៧។

កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា បានអនុម័ត​បញ្ចូល សេចក្តីព្រាងច្បាប់​ស្តីពី ការបង្កើត​ក្រសួង​អធិការកិច្ច និង​សេចក្តីព្រាងច្បាប់​ស្តីពី ការបង្កើត​រដ្ឋលេខាធិការដ្ឋាន​កិច្ចការ​ព្រំដែន ក្នុង​របៀបវារៈ​បន្ត​សម័យ​ប្រជុំ​រដ្ឋសភា លើក​ទី ១ នីតិកាល​ទី ៧ នា​ព្រឹក​ថ្ងៃ​ព្រហស្បតិ៍ ទី ១៤ ខែ​កញ្ញា ឆ្នាំ ២០២៣ ខាងមុខ បន្ទាប់ពី​សេចក្ដីព្រាងច្បាប់​ទាំងពីរ​នេះ ត្រូវ​បាន​គណៈកម្មការ​ជំនាញ​រដ្ឋសភា​ពិនិត្យ​សិក្សា​ចប់​សព្វគ្រប់​តាម​នីតិវិធី។

ជាមួយ​គ្នា​នេះ កិច្ចប្រជុំ​គណៈកម្មាធិការ​អចិន្ត្រៃយ៍​រដ្ឋសភា ក៏បាន​អនុម័ត​លើ​គម្រោង​ចំណាយ​ថវិកា​របស់​រដ្ឋសភា ឆ្នាំ ២០២៤ ដើម្បី​បញ្ជូន​ទៅ​ក្រសួង​សេដ្ឋកិច្ច និង​ហិរញ្ញវត្ថុ ដាក់បញ្ចូល​ទៅ​គម្រោង​ថវិកាជាតិ ក្នុង​សេចក្ដីព្រាងច្បាប់​ស្ដីពី​ហិរញ្ញវត្ថុ​សម្រាប់​ការ​គ្រប់គ្រង​ឆ្នាំ ២០២៤ ផង​ដែរ៕