ក្រុមហាម៉ាស់ ដោះលែងចំណាប់ខ្មាំង ជាម្តាយកូនចំនួន ៣នាក់

ក្រុមហាម៉ាស់ប៉ាឡេស្ទីន កាលពីថ្ងៃពុធទី១១ខែតុលា បានដោះលែងស្ត្រីជនជាតិអ៊ីស្រាអែល និងកូនពីរនាក់របស់នាង បន្ទាប់ពីត្រូវចាប់ជាចំណាប់ខ្មាំង។

វីដេអូមួយដែលត្រូវចេញផ្សាយដោយទូរទស្សន៍ Al Jazeera មានមូលដ្ឋាននៅទីក្រុង ដូហា បានបង្ហាញពីស្ត្រីម្នាក់ពាក់អាវពណ៌ខៀវ លាយផ្កាឈូក ដើរទៅរកកូន ហើយអ្នកទាំងពីរឱបគ្នា ខណៈអ្នកប្រយុទ្ធហាម៉ាស់ ដើរចេញទៅ។

វីដេអូនេះ ថតជាប់នៅកន្លែងដែល មើលទៅហាក់ដូចជា ជិតរបងព្រំដែនហ្គាហ្សា។

ទោះបីជាយ៉ាងណាក៏ដោយ គេមិនច្បាស់ទេថា តើវីដេអូនេះថតនៅពេលណា ហើយអាជ្ញាធរអ៊ីស្រាអែល ក៏មិនទាន់និយាយអ្វីដែរ ពាក់ព័ន្ធនឹងវីដេអូនេះ។

ក្នុង​សេចក្តី​ថ្លែងការណ៍​មួយ កងពលតូច Qassem ដែល​ជាសម្ព័ន្ធ​ប្រដាប់​អាវុធ​របស់​ក្រុម​ហាម៉ាស់ បាន​និយាយ​ថា ស្ត្រី​នោះ​គឺជា​ជនជាតិ​អ៊ីស្រាអែល។ សេចក្តីថ្លែងការណ៍បន្តថា “អ្នកតាំងទីលំនៅជនជាតិអ៊ីស្រាអែលម្នាក់ និងកូនពីរនាក់របស់នាង ត្រូវបានដោះលែង បន្ទាប់ពីការឃុំខ្លួនពួកគេ ក្នុងអំឡុងពេលប៉ះទង្គិចគ្នា”។

ឈ្លើយសឹកប្រមាណ១៥០នាក់ត្រូវបានចាប់ខ្លួនដោយក្រុមហាម៉ាស់ កាលពីថ្ងៃសៅរ៍សប្តាហ៍មុន ក្នុងអំឡុងពេលនៃការវាយលុកដែលមិនធ្លាប់មានពីមុនមកលើអ៊ីស្រាអែល។

ក្រសួង​សុខាភិបាល​របស់​ខ្លួន​និយាយ​ថា ការ​ទម្លាក់​គ្រាប់​បែក​របស់​អ៊ីស្រាអែល​មិន​ឈប់​ឈរ​ក្នុង​រយៈ​ពេល​ប្រាំ​ថ្ងៃ​ បាន​សម្លាប់​មនុស្ស​ជាង១០៥០នាក់ ​ក្នុង​នោះ​មាន​ជន​ស៊ីវិល​រាប់រយ​នាក់ និង​ជាង ៥០០០នាក់​ផ្សេង​ទៀត​រង​របួស​ នៅជ្រោយ​ហ្គាហ្សា៕

ប្រែសម្រួល៖ Vann Vann

ប្រភព៖ Aljazeera, Anadolu

ចុចអាន៖ ប្រៀបធៀបកម្លាំងយោធា រវាង អ៊ីស្រាអែល និង ប៉ាឡេស្ទីន