មេទ័ពអ៊ីរ៉ង់ ចេញមុខព្រមានវាយប្រហារខ្លាំងក្លា លើសហរដ្ឋអាមេរិក 

រដ្ឋមន្ត្រីការពារជាតិអ៊ីរ៉ង់ បានព្រមានកាលពីថ្ងៃអាទិត្យទី៥ខែវិច្ឆិកាថា សហរដ្ឋអាមេរិកនឹងប្រឈមផលវិបាកយ៉ាងធ្ងន់ធ្ងរ ប្រសិនបើអរិភាពនៅតំបន់ហ្គាហ្សា មិនត្រូវបានបញ្ចប់ទេនោះ។

លោក Mohammad-Reza Ashtiani និយាយថា “យើងសូមផ្តល់ដំបូន្មានដល់អាមេរិក ឲ្យបញ្ឈប់សង្រ្គាមនៅហ្គាហ្សាជាបន្ទាន់ ហើយអនុវត្តបទឈប់បាញ់ បើមិនដូច្នេះទេ ពួកគេនឹងរងការវាយប្រហារយ៉ាងខ្លាំងក្លា”។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អ៊ីរ៉ង់ កំពុងអំពាវនាវយ៉ាងសកម្មឲ្យបញ្ចប់ការបង្ហូរឈាមនៅទឹកដីប៉ាឡេស្ទីន ហើយបានចោទប្រកាន់ទីក្រុងវ៉ាស៊ីនតោនម្តងហើយម្តងទៀតថា ជាអ្នកបង្កភាពតានតឹងនៅមជ្ឈិមបូព៌ា ចាប់តាំងពីអ៊ីស្រាអែល បើកប្រតិបត្តិការយោធារបស់ខ្លួននៅតំបន់ហ្គាហ្សា ក្រោយការវាយប្រហារដ៏គួរឲ្យភ្ញាក់ផ្អើល មិនធ្លាប់មានដោយក្រុមហាម៉ាស ដែលបណ្តាលឲ្យប្រជាជនអ៊ីស្រាអែលប្រហែល១៤០០នាក់ស្លាប់។

ទន្ទឹមនោះ នៅព្រឹកថ្ងៃអាទិត្យ អ្នកនាំពាក្យក្រសួងការបរទេសអ៊ីរ៉ង់ លោក Nasser Kanaani ក៏បាននិយាយដែរថា អ៊ីស្រាអែលកំពុងប្រព្រឹត្តឧក្រិដ្ឋកម្មសង្គ្រាមនិងអំពើប្រល័យពូជសាសន៍ ជាមួយការគាំទ្រយ៉ាងពេញទំហឹងពីសំណាក់រដ្ឋាភិបាលសហរដ្ឋអាមេរិក។

លោក Kanaani និយាយថា “អំពើឧក្រិដ្ឋកម្មរបស់អ៊ីស្រាអែល ដែលត្រូវបានគាំទ្រយ៉ាងពេញទំហឹងដោយសហរដ្ឋអាមេរិក បានបង្ហាញពីស្មារតីដ៏ក្រអឺតក្រទមរបស់ទីក្រុងវ៉ាស៊ីនតោន ដែលញុះញង់ឲ្យមានការស្អប់ខ្ពើមក្នុងចំណោមប្រជាជាតិនានាជុំវិញពិភពលោក”។

គួរបញ្ជាក់ថា ទីក្រុងវ៉ាស៊ីនតោន បានបដិសេធអំពាវនាវឲ្យមានបទឈប់បាញ់ពេញលេញ រវាងអ៊ីស្រាអែលនិងក្រុមហាម៉ាស់ ដោយជ្រើសរើសយកការផ្អាកមនុស្សធម៌ជំនួសវិញ។

លើសពីនេះ មន្ទីរបញ្ចកោណក៏បានដឹកជញ្ជូនសព្វាវុធបន្ថែមទៅឲ្យកងទ័ពការពារអ៊ីស្រាអែល និងបញ្ជូនកងនាវាចរទៅកាន់សមុទ្រមេឌីទែរ៉ាណេខាងលិច ដើម្បីបង្ហាញការគាំទ្រដល់អ៊ីស្រាអែលផងដែរ៕

ប្រែសម្រួល៖ Vann Vann

ប្រភព៖ RT

ចុចអាន៖ FBI៖ អ៊ីរ៉ង់ រៀបផែនការធ្វើឃាតមន្ត្រីអាមេរិក