លោក ហុក សុកុល នាំយកតម្លៃនៃការស្រាវជ្រាវផ្ទះខ្មែរ ប្រមាណ ២ទសវត្សរ៍ ចូលរួមពិព័រណ៍សៀវភៅឆ្នាំនេះ

ជាលើកទីមួយហើយ សម្រាប់វត្តមាននៃស្ថាបត្យករខ្មែរ និងជាអ្នកចងក្រងឯកសារទាក់ទងនឹងប្រពៃណី-ទំនៀមទម្លាប់ ពិសេសសំណង់ខ្មែរដ៏ល្បី លោក ហុក សុកុល ចូលរួមក្នុងឱកាសពិព័រណ៍សៀវភៅកម្ពុជាលើកទី១០ ឆ្នាំ២០២៣ ដែលនឹងរៀបចំធ្វើឡើង ចាប់ពីថ្ងៃទី១៤-១៧ ខែធ្នូ ឆ្នាំ២០២៣ ក្នុងបរិវេណសួនច្បារមុខអគារ City Hall កោះពេជ្រ។ សម្រាប់ពិព័រណ៍លើកទី១០នេះ​ ស្ថាបត្យករខ្មែររូបនេះ ក៏បាននាំយកសៀវភៅចំណងជើង «ផ្ទះឈើខ្មែរ មរតក ១៥០០ឆ្នាំ» បីភាសា ដែលជាសហនិពន្ធជាមួយ លោក ដារៀល ខូលីនស៍ (ទទួលមរណភាព)។

តាមរយៈគណនីបណ្តាញទំនាក់ទំនងសង្គមហ្វេសប៊ុក របស់លោក “Hok Sokol” បញ្ជាក់ថា សៀវភៅផ្ទះឈើខ្មែរ ចំណងជើង «ផ្ទះឈើខ្មែរ មរតក ១៥០០ឆ្នាំ» នឹងមានលក់នៅស្តង់លេខ ២៧៧ ក្នុងកម្មវិធីពិព័រណ៍សៀវភៅកម្ពុជា។ ជាមួយគ្នានេះ លោកក៏បានបង្ហាញពីការបញ្ចុះតម្លៃសៀវភៅ ក្រោមការស្រាវជ្រាវ-ចងក្រងរបស់លោក និងលោក ដារៀល ខូលីនស៍ ប្រមាណ២ទសវត្សនេះផងដែរ។

គួរឱ្យដឹងដែរថា ទម្រាំចេញជាសមិទ្ធផលមួយនេះបាន លោកបានចំណាយពេលវេលាជាច្រើនឆ្នាំ លើការធ្វើដំណើរ និងសិក្សាស្រាវជ្រាវ លើសំណង់ស្ថាបត្យកម្មផ្ទះឈើខ្មែរជាច្រើន នៅទូទាំងប្រទេសកម្ពុជា។

សូមជម្រាបថា ពិព័រណ៍សៀវភៅកម្ពុជា លើកទី១០ ឆ្នាំ២០២៣ គឺកាន់តែប្លែកនិងអស្ចារ្យ មិនត្រឹមតែការរៀបចំកាន់តែធំប៉ុណ្ណោះទេ នៅឆ្នាំនេះ សង្កេតឃើញមានអ្នកនិពន្ធ និងចងក្រងសៀវភៅល្បីៗជាច្រើន ចូលរួមយ៉ាងកុះករ ញុាំងឱ្យព្រឹត្តិការណ៍លើកនេះ កាន់តែវិសេសវិសាល សម្រាប់អ្នកចូលរួម ពិសេសសិស្ស-និស្សិត៕