លោក គីម ជុងអ៊ុន ថា កូរ៉េខាងជើង មិនញញើតនឹងចុចប៊ូតុងនុយក្លេអ៊ែរ​ឡើយ បើមានការបង្កហេតុពីសត្រូវ

មេដឹកនាំកូរ៉េខាងជើង លោក គីម ជុងអ៊ុន បាននិយាយនៅថ្ងៃព្រហស្បតិ៍នេះថា រដ្ឋាភិបាលទីក្រុងព្យុងយ៉ាងនឹងមិនខ្លាចញញើត ក៏ដូចជាស្ទាក់ស្ទើរក្នុងការចុចប៊ូតុងនុយក្លេអ៊ែរដើម្បីបើកការវាយប្រហារឆ្លើយតបទៅនឹងការបង្កហេតុនុយក្លេអ៊ែរដូចគ្នាពីសំណាក់សត្រូវបរទេសនោះទេ ។

អមដោយកូនស្រីក្នុងពិធីអបអរសាទរក្រោយជោគជ័យបាញ់មីស៊ីលផ្លោងអន្តរទ្វីប Hwasong-18 នេះដែរ លោក គីម បានធ្វើការកត់សម្គាល់យ៉ាងដូច្នេះថា ការបាញ់មីស៊ីលផ្លោងកាលពីថ្ងៃចន្ទគឺបង្ហាញយ៉ាងច្បាស់ថា កូរ៉េខាងជើងនឹងមិនស្ទាក់ស្ទើរក្នុងការចុចប៊ូតុងវាយប្រហារនុយក្លេអ៊ែរនោះទេ នៅពេលដែលសត្រូវបង្ករឿងដោយអាវុធនុយក្លេអ៊ែរមកលើយើងមុន ។

ពាក់ព័ន្ធនឹងការបាញ់ផ្លោងមីស៊ីលនេះទៀសសោត ក្រុមប្រឹក្សាសន្តិសុខអង្គការសហប្រជាជាតិបានចេញការថ្កោលទោសចំពោះសកម្មភាពយ៉ាងគឃ្លើនរបស់រដ្ឋាភិបាលទីក្រុងព្យុងយ៉ាង ប៉ុន្តែមិនទុកយូរឡើយប្អូនស្រីលោក គីម គឺលោកស្រី គីម យ៉ូជុង ក៏បានចេញសេចក្ដីថ្លែងការណ៍ឆ្លើយតបទៅវិញផងដែរ ។

លោកស្រីបានចង្អុលចំៗទៅសម័យប្រជុំបន្ទាន់របស់ក្រុមប្រឹក្សាសន្តិសុខអង្គការសហប្រជាជាតិថា “ចាប់ពីពេលនេះតទៅ កងកម្លាំងអរិភាពដូចជា សហរដ្ឋអាមេរិក និងកូរ៉េខាងត្បូងកំពុងមានការភិតភ័យកាន់តែខ្លាំងទៅៗអំពីរបៀបការពារខ្លួន ប្រសិនបើមានការប្រឈមមុខដាក់គ្នាខាងយោធាជាមួយកូរ៉េខាងជើង” ។

គួរបញ្ជាក់ថា មីស៊ីល Hwasong-18 គឺជាប្រភេទមីស៊ីលផ្លោងអន្តរទ្វីប (ICBM) ដើរដោយឥន្ធនៈរឹងដំបូងគេបង្អស់របស់កូរ៉េខាងជើង បន្ទាប់ពីទីក្រុងព្យុងយ៉ាងបានអនុម័តច្បាប់មួយដែលអនុញ្ញាតឲ្យមានការវាយប្រហារដោយប្រើអាវុធនុយក្លេអ៊ែរដោយស្វ័យប្រវត្តិ និងភ្លាមៗជាការបង្ការទុកជាមុន ប្រសិនបើអាមេរិក និងកូរ៉េខាងត្បូង ព្យាយាមទម្លាក់លោក គីម ពីអំណាច ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ កូរ៉េខាងជើង បាញ់មីស៊ីលទៅតំបន់សេដ្ឋកិច្ចផ្ដាច់មុខ ជប៉ុន ខណៈប្រទេស នេះកំពុងរៀបចំកិច្ចប្រជុំជាមួយ អាស៊ាន