អាមេរិក ចេញបំភ្លឺរឿងបក្សប្រឆាំងឲ្យដកតំណែងរដ្ឋមន្ត្រីការពារជាតិដែល​កំពុងសម្រាកនៅមន្ទីរពេទ្យ

សារព័ត៌មាន CNN បានរាយការណ៍កាលពីថ្ងៃចន្ទថា មិនមានហេតុផលណាមួយដែលត្រូវបណ្ដេញរដ្ឋមន្ត្រីក្រសួងការពារជាតិសហរដ្ឋអាមេរិកលោក Lloyd Austin ចេញពីតំណែងនោះទេ ទោះបីជាខាងបក្សប្រឆាំងទាមទារឲ្យលោកចុះចេញ ក្រោមដើមហេតុកំពុងសម្រាកព្យាបាលជំងឺនៅមន្ទីរពេទ្យអស់រយៈពេលជាច្រើនថ្ងៃមកនេះក៏ដោយ ។

អ្នកនាំពាក្យក្រុមប្រឹក្សាសន្តិសុខជាតិលោក John Kirby បានប្រាប់សន្និសីទសារព័ត៌មាននៅតាមផ្លូវទៅកាន់រដ្ឋ South Carolina ថា “រដ្ឋបាលរបស់លោកប្រធានាធិបតី Joe Biden មិនមានផែនការ ឬសេណារីយ៉ូអ្វីផ្សេងក្រៅពីឲ្យលោករដ្ឋមន្ត្រី Austin បន្តកិច្ចការងារ និងដឹកនាំក្រសួងមួយនេះដដែលនោះឡើយ” ។

លោក Kirby បានលើកឡើងទៀតថា “ការយកចិត្តទុកដាក់ទៅលើបញ្ហាសុខភាព និងការព្យាបាលថែទាំងលោក Austin ឲ្យជាសះស្បើយ គឺជារឿងចាំបាច់របស់លោកប្រធានាធិបតី Joe Biden ជាពិសេសថ្នាក់ដឹកនាំទាំងអស់កំពុងទន្ទឹងរង់ចាំឲ្យលោករដ្ឋមន្ត្រីវិលត្រលប់មកអង្គុយធ្វើការនៅមន្ទីរបញ្ចកោណវិញឲ្យបានឆាប់តាមដែលអាចធ្វើទៅបាន” ។

អ្នកនាំពាក្យរូបនេះបានបញ្ជាក់បន្ថែមថា “សូម្បីរូបលោកផ្ទាល់ក៏គោរព និងឲ្យតម្លៃការងារដ៏អស្ចារ្យដែលលោក Austin ដឹកនាំសម្រេចបានក្នុងនាមជារដ្ឋមន្ត្រីការពារជាតិ ក៏ដូចជាក្បួនយុទ្ធសាស្ត្រដោះស្រាយវិបត្តិជាច្រើនដែលលោកដាក់ចេញមកក្នុងរយៈពេលជិត ២ ឆ្នាំចុងក្រោយនេះផងដែរ” ។

ដំណឹងនៃការចូលសម្រាកព្យាបាលនៅមន្ទីរពេទ្យរបស់លោក Austin កាលពីថ្ងៃឆ្លងឆ្នាំសកលទាំងដែលមិនដឹងមូលហេតុពិតប្រាកដនោះ កំពុងផ្ទុះការរិះគន់យ៉ាងចាស់ដៃពីសំណាក់ក្រុមប្រឆាំង ជាពិសេសគឺអតីតប្រធានាធិបតីលោក Donald Trump តែម្ដង ។

លោក Trump ដែលតែងតែប៉ះសម្ដីជាមួយមន្ត្រីរដ្ឋបាលរបស់លោក Biden បានលើកឡើងថា “កុំទុកយូរអី រដ្ឋមន្ត្រីការពារជាតិ Lloyd Austin គួរតែត្រូវបានបណ្ដេញចេញពីតំណែងភ្លាមៗទៅ ដោយសារតែលោកគ្មានទំនួលខុសត្រូវ និងទុកការងារប្រទេសជាតិចោល” ។

គួរបញ្ជាក់ថា លោក Lloyd Austin បានចូលសម្រាកព្យាបាលជំងឺនៅមន្ទីរពេទ្យយោធាជាតិ Walter Reed កាលពីថ្ងៃទី១ ខែមករា ដោយមិនដឹងមូលហេតុច្បាស់លាស់ ប៉ុន្តែយោងតាមសេចក្ដីរាយការណ៍ រដ្ឋមន្ត្រីវ័យ ៧០ ឆ្នាំរូបនេះមានអាការៈ និងស្មារតីល្អប្រសើរវិញហើយ ក្រោយដឹកចូលសម្រាកក្នុងបន្ទប់សង្គ្រោះបន្ទាន់ (ICU) រយៈពេល ៤ ថ្ងៃ ៕

ប្រែសម្រួលដោយ ៖ ជីវ័ន្ត

ចុចអាន ៖ រដ្ឋមន្ត្រីការពារជាតិ អាមេរិក Lloyd Austin ចូលសម្រាកព្យាបាលនៅមន្ទីរ​ពេទ្យលើកទី ២ ដោយមិនដឹងមូលហេតុ