យុវជនសម្បត្តិមានជ័យប៉ះពពែតអេហ្វស៊ីប្រជែងកំពូលតារាងពូល ខ ស្វាយរៀងខាប់

ក្រុម​បាល់ទាត់​យុវជន​សម្បត្តិ​មាន​ជ័យ​ប្រជែង​មួយ​ក្រុម​​ពពែត​អេហ្វស៊ី​ដើម្បី​ឈរ​លើ​កំពូល​តារាង​ពូល ខ ក្នុងសប្តាហ៍ទី​៤ ​ពាន​រង្វាន់​ស្វាយរៀង​ខាប់ លើក​ទី​៦ នា​ថ្ងៃ​សៅរ៍ ទី​២០ ខែ​មករា ឆ្នាំ​២០២៤ នៅ​វិទ្យាល័យ​ស្វាយរំពារ។

នេះ​ជា​ការ​ប្រកួត​លើក​ទី​២​សម្រាប់​ក្រុម​ទាំង​ពីរ បន្ទាប់​ពី​លើក​ទី១​​មិន​ទាន់​ស្គាល់​បរាជ័យ​ដូច​គ្នា។ យុវជន​សម្បត្តិ​មាន​ជ័យ​រក​បាន​៣​ពិន្ទុ​ពេញ​ពី​ការ​ប្រកួត​លើក​ទី១​ដែល​បាន​យក​ឈ្នះ​លើ​ក្រុម យុវជន​ច្រកលាវ ដោយ​លទ្ធផល ២-០ ដើម្បី​ឈរ​លើ​កំពូល​តារាង​ពូល ខ។ ចំណែក​ក្រុម​ពពែត អេហ្វស៊ី រក​បាន​តែ​១​ពិន្ទុ​ប៉ុណ្ណោះ​សម្រាប់​ការ​ប្រកួត​សន្សំ​ពិន្ទុ​លើក​ទី១ បន្ទាប់​ពី​ស្មើ​គ្នា​ជា​មួយ​ក្រុម យុវជន​ភូមិ​ព្រៃធ្លក ដោយ​លទ្ធផល ២-២។ យ៉ាង​ណា ក្រុម​នេះ​ឈរ​ចំណាត់​ថ្នាក់​លេខ​២​ក្នុង​ពូល។

ការ​ប្រកួត​លើក​ទី២​ដែល​ត្រូវ​នឹង​ការ​ប្រកួត​សប្តាហ៍​ទី​៤ វគ្គ​សន្សំ​ពិន្ទុ​ក្នុង​ពូល​នេះ ក្រុមយុវជន​សម្បត្តិមានជ័យ ​ត្រូវ​ស្វែង​រក​ពិន្ទុ​ឲ្យ​ខាង​តែ​បាន​ដើម្បី​បន្តឈរ​លើ​កំពូល​តារាង ប៉ុន្តែ​ប្រសិន​បើ​ភ្លាត់​ចាញ់​ នោះ​តំណែង​កំពូល​តារាង​នឹង​ធ្លាក់​ពី​លេខ​១ ហើយ​ក្រុម​ពពែត​អេហ្វស៊ី​នឹង​ឡើង​ទៅ​ឈរ​លើ​កំពូល​តារាង។

ក្រៅ​ពី​ការ​ប្រកួត​គូ​ខាងលើ ក៏​មាន​៥​គូ​ផ្សេង​ទៀត​ដែល​ត្រូវ​ប្រកួត​ក្នុង​សប្តាហ៍​ទី​៤​នៅ​លើ​ទី​លាន​វិទ្យាល័យ​ស្វាយរំពារ​នៅ​ថ្ងៃ​សៅរ៍ ទី​២០ ខែ​មករា និង​ថ្ងៃ​អាទិត្យ ទី​២១ ខែ​មករា។

កម្មវិធីប្រកួតថ្ងៃសសៅរ៍ ទី​២០ ខែ​មករា

• យុវជន​ភូមិព្រៃធ្លក vs United SEZ (ម៉ោង​៨​:០០នាទីព្រឹក)
• យុវជន​ឃុំសម្បត្តិមានជ័យ vs ពពែត អេហ្វស៊ី (ម៉ោង​១:៣០​នាទីរសៀល)
• សេះ​ស អេហ្វស៊ី vs សៀងហៃរីហ្សត អេហ្វស៊ី (ម៉ោង​៣:៣០​នាទី​រសៀល)

កម្មវិធី​ប្រកួតថ្ងៃ​អាទិត្យ ទី២១ ខែ​មករា

• ភូមិហ៊ីង  vs សសយក ឃុំត្នោត (៨:០០​នាទី​ព្រឹក)
• យុវជនគគីសោម vs យុវជនសាមគ្គី (ម៉ោង​១:៣០នាទី​រសៀល)
• រាជហ៍ ស្វាយរំពារ vs ហង្ស សំណាង (ម៉ោង​៣:៣០​នាទី​រសៀល)

អត្ថបទ៖ វីរបុត្រ