កីឡា

តើ U15 ព្រះខ័នរាជស្វាយរៀង ឬ គោព្រៃភូមិស្វាយធំ ជាជើងឯក ស្វាយរៀងខាប់ U15 ថ្ងៃស្អែក?

បានផុស

៤ ខែ មុន

នៅ

ថ្ងៃសុក្រ ១៣ កុម្ភៈ ២០២៦

ដោយ

បន្ទាប់ពីប្រើពេលប្រកួតអស់ជាច្រើនខែ ទីបំផុតការប្រកួតពានរង្វាន់ស្វាយរៀងខាប់ យុវជនអាយុ ១៥ ឆ្នាំ លើកទី២ ឈានដល់វគ្គផ្តាច់ព្រ័ត្រហើយនៅពេល ក្រុម U15 ព្រះខ័នរាជស្វាយរៀង ត្រូវតទល់នឹង U15 គោព្រៃភូមិស្វាយធំ នៅល្ងាចថ្ងៃសៅរ៍ ទី១៤ ខែកុម្ភៈ ឆ្នាំ ២០២៦ នៅកីឡដ្ឋានខេត្តស្វាយរៀង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពានរង្វាន់ស្វាយរៀងខាប់ អាយុ ១៥ ឆ្នាំ លើកទី២ បានចាប់ផ្តើមតាំងពីថ្ងៃទី១១ ខែតុលា ឆ្នាំ ២០២៥ ដោយមានក្រុមចំនួន ១៥ មកពីបណ្តាស្រុក-ក្រុងទាំង ៨ នៃខេត្តស្វាយរៀងបានចូលរួមប្រកួត។ ក្រុមទាំង ១៥ ត្រូវបានបែងចែកជា ៤ ពូល ហើយធ្វើការប្រកួតសន្សំពិន្ទុក្នុងពូលជាច្រើនសប្តាហ៍ មុនពេលរកឃើញក្រុមឡើងវគ្គ ៨ ក្រុមចុងក្រោយ វគ្គពាក់កណ្តាលផ្តាច់ព្រ័ត្រ និងវគ្គផ្តាច់ព្រ័ត្រ។

ក្រុមខ្លាំងពីរគឺ ក្រុម U15 ព្រះខ័នរាជស្វាយរៀង និង ក្រុម U15 គោព្រៃភូមិស្វាយធំ មិនទាន់ស្គាល់បរាជ័យដូចគ្នា មុនពេលឈានដល់វគ្គផ្តាច់ព្រ័ត្រ ប៉ុន្តែក្រុម U15 ព្រះខ័នរាជស្វាយរៀង ធ្វើបានល្អជាងដោយសារឈ្នះគ្រប់ការប្រកួត ខណៈក្រុម U15 គោព្រៃភូមិស្វាយធំ ធ្លាប់ស្មើ។

លទ្ធផលការប្រកួតកន្លងមកក នៅវគ្គសន្សំពិន្ទុក្នុងពូលចំនួន ៧ ប្រកួត ក្រុម U15 ព្រះខ័នរាជស្វាយរៀង ទទួលបានជ័យជម្នះទាំង ៧ ប្រកួត។ នៅវគ្គ ៨ ក្រុមចុងក្រោយ យុវជនព្រះខ័នរាជស្វាយរៀង បានឈ្នះ ក្រុម ត្នោត អេហ្វស៊ី ៨-០ និងឈ្នះ ក្រុមសាលាបឋមសិក្សាជ្រៃធំ ៦-០ ក្នុងវគ្គពាក់កណ្តាលផ្តាច់ព្រ័ត្រ។

ចំណែកក្រុម U15 គោព្រៃភូមិស្វាយធំ នៅវគ្គសន្សំពិន្ទុក្នុងពូល គឺបានឈ្នះ ៤ ប្រកួត និងស្មើ ២ ប្រកួត ខណៈវគ្គ ៨ ក្រុមចុងក្រោយបានឈ្នះក្រុម សាមគ្គីកីឡា ៣-១ និងបន្តឈ្នះក្រុម យុវជនសាមគ្គី ២-១ នៅវគ្គពាក់កណ្តាលផ្តាច់ព្រ័ត្រ។

សូមបញ្ជាក់ថា នៅវេលាម៉ោង ២ រសៀល ជាការប្រកួតដណ្តើមលេខ ៣ រវាង ក្រុមយុវជនសាមគ្គី ជាមួយក្រុម យុវជនសាលាបឋមសិក្សាជ្រៃធំ។ នៅវេលាម៉ោង ៤ រសៀល ជាការប្រកួតដណ្តើមជើងឯករវាង ក្រុមយុវជន ព្រះខ័នរាជស្វាយរៀង ជាមួយ ក្រុមយុវជនគោព្រៃភូមិស្វាយធំ៕