FBI ថា ក្រុម Hacker ចិន ដាក់ផ្ទាំងស៊ីបលើហេដ្ឋារចនាសម្ព័ន្ធ អាមេរិក

FBI បាននិយាយថា សហរដ្ឋអាមេរិកបានបើកកិច្ចខិតខំប្រឹងប្រែងដើម្បីបិទក្រុម Hacker ដែលគាំទ្រដោយរដ្ឋចិន ដែលបាននិងកំពុងផ្តោតលើហេដ្ឋារចនាសម្ព័ន្ធសាធារណៈសំខាន់ៗរបស់សហរដ្ឋអាមេរិក ខណៈអ្នកជំនាញសន្តិសុខតាមអ៊ីនធឺណិតនៅអាមេរិកក៏ធ្លាប់បានព្រមានដែរថា ចិនកំពុងកំណត់គោលដៅលើហេដ្ឋារចនាសម្ព័ន្ធ ដើម្បីដាក់ការរំខានដល់ទំនាក់ទំនងរវាងប្រទេសទាំងពីរក្នុងករណីមានជម្លោះ ។ នេះបើយោងតាមការចេញផ្សាយរបស់សារពត៌មាន BBC កាលពីថ្ងៃទី១ ខែកុម្ភៈកន្លងទៅ ។

នាយក FBI ​លោក Christopher Wray បានប្រាប់គណៈកម្មាធិការសភាអាមេរិកកាលពីពេលថ្មីៗនេះថា ខ្លួនបានអនុវត្តយុទ្ធនាការមួយដើម្បីបិទក្រុម “Volt Typhoon” ដែលគាំទ្រដោយប្រទេសចិន កំពុងមានចេតនាដើម្បីបង្ខូចប្រព័ន្ធហេដ្ឋារចនាសម្ព័ន្ធសំខាន់ៗរបស់សហរដ្ឋអាមេរិក ។

លោកបានចោទប្រកាន់ថា ក្រុមនោះបានលួចចូលទៅក្នុង Router ដើម្បីចូលប្រើទិន្នន័យលើទ្រព្យសម្បត្តិរបស់សហរដ្ឋអាមេរិក ហើយក្រុមនេះបានកំណត់គោលដៅលើហេដ្ឋារចនាសម្ព័ន្ធសំខាន់ៗ រួមទាំងប្រព័ន្ធប្រព្រឹត្តកម្មទឹក បណ្តាញអគ្គិសនី ប្រព័ន្ធដឹកជញ្ជូន បំពង់បង្ហូរប្រេង និងឧស្ម័ន ព្រមទាំងបណ្តាញទូរគមនាគមន៍ផងដែរ ក្នុងគោលបំណងធ្វើឲ្យមានភាពវឹកវរ និងបង្កគ្រោះថ្នាក់ដល់ពិភពលោក ។

រហូតមកដល់ពេលនេះ រដ្ឋាភិបាល​ចិន​នៅ​មិន​ទាន់​ឆ្លើយ​តប​នឹង​ការ​ចោទ​ប្រកាន់​នេះ​នៅ​ឡើយ​ទេ ប៉ុន្តែទោះបីជាយ៉ាងណាក៏ដោយ ចិនក៏ធ្លាប់បានចោទប្រកាន់សហរដ្ឋអាមេរិកវិញដែរថា ជាអាណាចក្រនៃក្រុម Hacker ដ៏ធំបំផុតរបស់ពិភពលោក ហើយទីក្រុងប៉េកាំងថែមទាំងបានរិះគន់គណៈកម្មាធិការសភាអាមេរិកស្តីពីការប្រកួតប្រជែងរវាងសហរដ្ឋអាមេរិក និងចិន ក៏ដូចជាបដិសេធរាល់ការចោទប្រកាន់ពីបទឧក្រិដ្ឋកម្មតាមអ៊ីនធឺណិតទាំងអស់ផងដែរ ៕

អត្ថបទ ៖​ ប៊ុន​ សុភាព