ឃាត់រថយន្តដឹកក្រពើជិត ៤០០ ក្បាលនៅខេត្ត វៀតណាម ជាប់​ព្រំដែន កម្ពុជា

អាជ្ញាធរវៀតណាមកាលពីថ្ងៃព្រហស្បតិ៍បានរកឃើញរថយន្តដឹកសត្វក្រពើជិត ៤០០ ក្បាល និងមានទម្ងន់សរុប ៥ តោននៅក្នុងខេត្ត Dong Thap ភាគខាងត្បូងជាប់ព្រំដែនខេត្តព្រៃវែងរបស់ព្រះរាជាណាចក្រកម្ពុជា ។ នេះបើយោងតាមការចេញផ្សាយដោយសារព័ត៌មាន VN Express កាលពីថ្ងៃទី១ ខែកុម្ភៈកន្លងទៅ ។

រថយន្តដឹកក្រពើមួយគ្រឿងនេះបើកបរដោយបុរសម្នាក់ឈ្មោះ Nguyen Van Luan អាយុ ៣៧ ឆ្នាំ ពោលតាំងតែពីថ្ងៃទី២៤ ខែមករាមកម្ល៉េះ ហើយនៅក្នុងរថយន្តនោះមានក្រពើចំនួន ៣៩១ ក្បាល ខណៈអ្នកបើកបរក៏បានសារភាពដែរ​ថា គាត់​បាន​ទិញ​ក្រពើទាំងនេះចេញ​ពី​ប្រទេស​កម្ពុជា ហើយ​ហៀបនឹង​លក់​វាទៅឲ្យឈ្មួញកណ្ដាល​ ។

ពាក់ព័ន្ធនឹងបញ្ហានេះ យោងតាមសេចក្ដីរាយការណ៍បានឲ្យដឹងទៀតថា ប៉ូលិសខេត្ត Dong Thap ក៏បានបើកការស៊ើបអង្កេតលើករណីនេះផងដែរ ថាតើរំលោភលើច្បាប់ស្តីពីការគ្រប់គ្រង និងការការពារសត្វកម្រជិតផុតពូជដែរឬក៏យ៉ាណា ។

ទោះយ៉ាងណា ក៏មានក្រពើមួយចំនួនបានងាប់បាត់ទៅហើយ ហើយក្រពើដែលនៅរស់​ត្រូវ​បាន​អាជ្ញាធរពាក់ព័ន្ធដឹក​យក​ទៅ​ចិញ្ចឹម​នៅ​ក្នុងកសិដ្ឋានមួយកន្លែង និងរង់ចាំ​នីតិវិធី​បន្តទៅលើអ្នកបើកបរ និងអ្នកពាក់ព័ន្ធទាំងអស់ ។

គួរបញ្ជាក់ថា សត្វក្រពើគឺជាទីផ្សារដ៏ត្រូវប៉ាន់មួយនៅក្នុងប្រទេសវៀតណាម ជាពិសេសផលិតផល​ធ្វើ​ស្បែក​ក្រពើ​មាន​ដូចជា ​កាបូប​យួរដៃ កាបូប​លុយ ខ្សែ​ក្រវាត់ និង​ខ្សែ​នាឡិកា មាន​ការ​ពេញ​និយមយ៉ាងខ្លាំង​ពី​សំណាក់​ភ្ញៀវ​ប្រើប្រាស់​ក្នុង​ស្រុក និង​បរទេស ខណៈការលក់​នៅក្នុង​តំបន់​ទេសចរណ៍ និង​តាម​ព្រលាន​យន្តហោះក៏មានការគាំទ្រផងដែរ ៕

ដោយ ៖ សុខ ជីវ័ន្ត

ចុចអាន ៖ មកដឹង ថ្លៃផាកពិន័យអ្នកបើកបរក្នុងស្ថានភាពស្រវឹង លើសកម្រិតជាតិ អាល់កុលនៅ វៀតណាម