និស្សិតខ្មែរនៅម៉ាឡេស៊ី រង់ចាំស្វាគមន៍ដំណើរទស្សនកិច្ច សម្តេចធិបតី

និស្សិតខ្មែរដែលកំពុងសិក្សានៅប្រទេសម៉ាឡេស៊ី បានចេញសារគាំទ្រ និងរងចាំស្វាគមន៍យ៉ាងកក់ក្តៅចំពោះដំណើរទស្សនកិច្ចផ្លូវការរបស់ សម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី និងគណៈប្រតិភូរាជរដ្ឋាភិបាលកម្ពុជា មកបំពេញទស្សនកិច្ចផ្លូវការនៅប្រទេសម៉ាឡេស៊ី នៅចុងខែកុម្ភៈ ឆ្នាំ២០២៤ ខាងមុខនេះ។

ការចេញសារគាំទ្រ យ៉ាងផុសផុលបែបនេះ បន្ទាប់ពី សម្តេចមហាបវរធិបតី ហ៊ុន ម៉ាណែត និងគណៈប្រតិភូកម្ពុជា គ្រោងនឹងធ្វើដំណើរទៅទស្សនកិច្ចផ្លូវការ ទៅកាន់ប្រទេសម៉ាឡេស៊ី នៅថ្ងៃទី២៧ ខែកុម្ភៈ ឆ្នាំ២០២៤។

ក្នុងចំណោមនិស្សិតទាំងនោះ យុវជន ម៉ូ ហាន់ស៊ី និស្សិតខ្មែរកំពុងសិក្សានៅប្រទេសម៉ាឡេស៊ី បានលើកឡើងថា លោកសូមសម្តែងការស្វាគមន៍យ៉ាងកក់ក្តៅ និងមានសេចក្តីសោមនស្សរីករាយក្រៃលែងដែលបានលឺដំណឹងថា សម្តេចមហាបវរធិបតី នាយករដ្ឋមន្ត្រី នឹងធ្វើដំណើរមកបំពេញទស្សនកិច្ចផ្លូវការនៅប្រទេសម៉ាឡេស៊ី នៅថ្ងៃទី២៧ ខែកុម្ភៈ ឆ្នាំ២០២៤ ខាងមុខនេះ។ 

ចំណែកយុវជន ម៉ាន់ អាហ្វីន និស្សិតខ្មែរកំពុងសិក្សានៅប្រទេសម៉ាឡេស៊ី បានលើកឡើងថា លោកគាំទ្រ និងរង់ចាំស្វាគមន៍យ៉ាងកក់ក្តៅចំពោះដំណើរទស្សនកិច្ចផ្លូវការរបស់សម្តេចមហាបវរធិបតី។ លោក សូមជូនសម្តេច និងគណៈប្រតិភូរាជរដ្ឋាភិបាលកម្ពុជាទាំងអស់ ទទួលបានជោគជ័យលើដំណើរមកកាន់ប្រទេសម៉ាឡេស៊ីនេះ៕