ចិនផ្ដល់ជំនួយថវិកាជាង ៤ លានដុល្លារ ដើម្បី​បោសសម្អាតមីននៅកម្ពុជា

រដ្ឋាភិបាលសារធារណរដ្ឋប្រជាមានិតចិនបានសម្រេចផ្ដល់ជំនួយហិរញ្ញប្បទានឥតសំណងមកកម្ពុជាជាង ៤ លានដុល្លារ អាមេរិក​(៤.៤០០.០០០​) ដែលបានអនុម័តនៅដំណាច់ខែមីនា ឆ្នាំ ២០២៤ នេះ ដើម្បីគាំទ្រមជ្ឈមណ្ឌលសកម្មភាពម្ចាត់​មីន​កម្ពុជា (CMAC) ក្នុងការអនុវត្ត “គម្រោងជំនួយចិនលុបបំបាត់គ្រាប់មីននៅកម្ពុជា”។

លោក ហេង រតនា ប្រតិភូរាជរដ្ឋាភិបាលទទួលបន្ទុកជាអគ្គនាយកនៃមជ្ឈមណ្ឌលសកម្មភាពកំចាត់មីនកម្ពុជាបានឱ្យដឹងថា គម្រោងក្នុងឆ្នាំ២០២៤​នេះ មានផែនការបន្តកិច្ចប្រតិបត្តិការបោស​សម្អាតមីន និងសំណល់យុទ្ធភណ្ឌសង្គ្រាមក្នុងខេត្តចំនួន៣រួមមាន ខេត្តកំពង់ធំ ខេត្តសៀមរាប និងខេត្តព្រះវិហារ ដោយផ្ដោតលើសកម្មភាពសំខាន់ៗដូចជា ១. ការបោសសម្អាតផ្ទៃដីមានបញ្ហាគ្រាប់មីន និងសំណល់យុទ្ធភណ្ឌ សង្គ្រាមចំនួនជាង៣.៤០០ហិកតា ២. ការស្រាវជា្រវនិងប្រមូលព័ត៌មានអំពីសំណល់យុទ្ធភណ្ឌសង្គ្រាមនិងគ្រាប់បែកចង្កោមចំនួនប្រមាណ ៩.០០០ ពហុកោណ​(ទីតាំង)​ និង៣. ការពង្រឹងសមត្ថភាពថ្នាក់ក្រោមជាតិលើការងារអប់រំយល់ដឹងពីគ្រោះថ្នាក់ដោយសារមីន និងសង្គ្រោះជនពិការដោយសារមីន​ចំនួនជាង៣០០គោលដៅ​។

គម្រោងនេះផ្តល់ផលប្រយោជន៍ដោយផ្ទាល់ និងដោយប្រយោលដល់ប្រជាពលរដ្ឋប្រមាណ៧០មុឺននាក់។

សូមបញ្ជាក់ថា​ នេះជាគម្រោងជំនួយឆ្នាំទី២នៃគំរោងជំនួយរយ:ពេល៣ឆ្នាំ​មីនា២០៣-កុម្ភៈ​ ២០២៦​ ដែលមានជំនួយ​ហិរញ្ញប្បទានឥតសំណងសរុបចំនួន ១៣.២ លានដុល្លារអាមេរិក៕